U arrestua një 23 vjeçar për ‘lëndim të rëndë trupor’

Policia sot ka informuar se ka arrestuar një person nën dyshimin e përfshirjes në veprën penale: ‘lëndim i rëndë trupor’.
Sipas policisë, bazuar, në hetimet policore, lind dyshimi se pikënisje e rastit mund të ishte një ngjarje e më hershme (disa javë më herët) e ndodhur në një lokal në fshatin Strazhë, konkretisht një mosmarrëveshje në mes viktimës dhe të dyshuarit-ve.
“Policia në Stacionin Policor (S.P) Novobërdë, më 09.08.2021, rreth orës: 20:00, ishte informuar se në fshatin Zebincë-Novobërdë, respektivisht në rrugën lokale që lidhë fshatrat Stanishor dhe Prekoc, një person N.P., viti i lindjes 1998, mashkull kosovar, ishte sulmuar nga persona të panjohur. Viktima, atë natë kishte pranuar tretman mjekësor në Spitalin e Gjilanit, për rastin ishte njoftuar prokurorja kujdestare dhe menjëherë kishin filluar hetimet policore për të identifikuar të dyshuarit. Pas një pune intensive hetimore, fillimisht nga zyrtarë policorë të SP Novobërdë dhe më pas nga njësia e Hetimeve të Përgjithshme–Gjilan, bazuar në deklarimin e viktimës se ai ishte sulmuar derisa ishte në rrugë, kur persona për të panjohur (dy kishin dalë nga vetura dhe një i tretë kishte qëndruar në veturë), kishin dalë nga vetura dhe e kishin sulmuar.”, ka informuar policia.
Pas punës hetimore, policia ka informuar se ka ardhur tek informacioni lidhur me veturën, e cila kishte qenë e përfshirë në rast, janë identifikuar tabelat e veturës dhe pronari i saj.
“Ai është ftuar në intervistë, i përballur me të gjeturat policore ka pranuar se ka qenë i përfshirë në rast, por se nuk i njeh personat tjerë të përfshirë në ngjarje. Në konsultim me prokurorin, me aktvendim të tij, i dyshuari ndalet për 48 orë në mbajtje.”, ka informuar policia.
Hetuesit policorë janë duke vazhduar hetimet lidhur me këtë rast./21Media