Ulutas pranoi zyrtarisht detyrën e komandantit të KFOR-it
(Lajm i përditësuar)
Në kampin “Film City” në Prishtinë është bërë ndërrimi i komandës së KFOR-it mes Angelo Michele Ristuccia dhe Özkan Ulutaş.
Në ceremoninë e ndërrimit të komandës po marrin pjesë ministri i Mbrojtjes, Ejup Maqedonci, ministri i Punëve të Brendshme, Xhelal Sveçla, kryetari i Prishtinës, Përparim Rama, krerë fetarë e figura tjera të larta shtetërore.
Mandati i komandatit të ri turk të KFOR-it do të jetë një-vjeçar.
Në inagurimin e komandatit të 28-të KFOR-it në Kosovë, po merr pjesë edhe admirali Stuart B. Munsch, i cili është komandant i Komandës së Forcave te Përbashkëta Aleate të NATO-s në Napoli.
Ky i fundit pas ceremonisë do të mbajë konferencë për media.
Ceremonia e ndërrimit të komandës së KFOR-it
Në kampin “Film City” në lagjen “Arbëria” në Prishtinë po zhvillohet ceremonia e ndërrimit të komandës së misionit paqeruajtës të NATO-s në Kosovë.
Me rastin e inaugurimit të komandantit të 28-të KFOR-it në Kosovë ka ardhur edhe admirali Stuart B. Munsch, që është komandant i Komandës së Forcave të Përbashkëta Aleate të NATO-s në Napoli.
Në një fjalë rasti, admirali Stuart B. Munsch, ka bërë të ditur se KFOR-i ka përforcuar koordinimin me Policinë e Kosovës si reaguesi i parë.
Gjenerali italian Angelo Michele Ristucca, ka thënë se në këtë rajon ka vetëm një përgjigje e cila është paqe dhe stabilitet.
Për punën e tij njëvjeçare në krye të misionit paqeruajtës të aleancës veri-atlantike në Kosovë, Ristucca mbajti të premten e shkuar edhe konferencën lamtumirës.
Turqia sot merr komandën e KFOR-it në Kosovë
Turqia do të marrë komandën e KFOR-it në një kohë kritike pasi tensionet shpërthyen mes Kosovës dhe Serbisë.
Turqia, e cila ka ushtrinë më të madhe në NATO pas ShBA-së, do të marrë drejtimin e misionit nga Italia më 10 tetor, tha të enjten kundëradmirali Zeki Akturk, zëdhënës i Ministrisë së Mbrojtjes së Turqisë.
Vendi ka marrëdhënie me të dyja palët, pasi ka zhvilluar lidhje tregtare me Serbinë ndërkohë që ka furnizuar me drone luftarake aleatin, Kosovën, raporton “Bloomberg”.
Turqia e sheh raportin personal të presidentit Recep Tayyip Erdogan me presidentin serb Aleksandar Vuçiq si potencialisht vendimtar në parandalimin e një përshkallëzimi të dhunës pas shkëmbimit të zjarrit vdekjeprurës të javës së kaluar në Kosovë, sipas njerëzve të njohur me këtë çështje.
ShBA-ja i ka kërkuar Serbisë që të tërheqë trupat e saj nga kufiri me Kosovën dhe të mbajë përgjegjës përgjegjësit për dhunën, ku mbeti i vrarë një polic i Kosovës dhe tre nga grupi terrorist.
Turqia planifikon t’i kërkojë Kosovës dhe Serbisë që të përmbahen nga veprimet që mund të dëmtojnë përpjekjet vjetore për të normalizuar marrëdhëniet midis fqinjëve, thanë njerëz të informuar në kushte anonimiteti.
Gjeneralmajor Ozkan Ulutas i ushtrisë turke mbërriti në Kosovë të martën për të marrë komandën e misionit, i cili përfshin një forcë turke prej rreth 600 trupash.
“” shkruan se Turqia e ka mbështetur tradicionalisht Kosovën, me të cilën ndan lidhje fetare dhe etnike, dhe së fundi i ka shitur vendit gjashtë dronë luftarakë pa pilot “Bayraktar TB2” të përdorur gjithashtu nga Ukraina për të luftuar forcat ruse.
Kompanitë turke përdorin Serbinë si bazë prodhimi për eksportet në Evropë dhe Rusi, thanë njerëzit, duke shtuar se disa biznese, duke përfshirë sektorët e automobilave dhe tekstilit, kanë hapur biznes në Serbi, ku ka dhjetëra degë të huadhënësit shtetëror të Turqisë “Halkbank”.
Erdogani mund të vizitojë Beogradin si pjesë e një turneu në rajon në muajt e ardhshëm.
Dëshiron ta dëgjosh këtë lajm me zë?