UNESCO i tërheq vërejtjen Rusisë

Agjencia e Kombeve të Bashkuara për Trashëgiminë Kulturore (UNESCO)ka konfirmuar se të paktën 53 vende historike, ndërtesa fetare dhe muze janë dëmtuar gjatë pushtimit rus të Ukrainës .
“Kjo është lista e fundit, por nuk është përfundimtare, pasi ekspertët tanë po vazhdojnë të verifikojnë një numër raportesh” të paraqitura nga autoritetet ukrainase, tha një zëdhënës i UNESCO -s për AFP.
Zëdhënësi tha se UNESCO përdori imazhe satelitore dhe raporte të dëshmitarëve nga vendi i ngjarjes për të verifikuar informacionin e dhënë nga autoritetet ukrainase. Vendet që UNESCO tha se janë dëmtuar përfshijnë më shumë se një duzinë në rajonin lindor të Kharkiv, i cili është vënë nën zjarrin intensiv rus, duke filluar nga kishat deri te vendet më moderne të trashëgimisë, përcjell portali rtv21.tv
Pesë janë në kryeqytet, Kiev, ndërsa pesë të tjera janë në rajonin Chernihiv të Ukrainës veriore, i cili është shtëpia e një grupi vendesh historike.
UNESCO tha se, në përgjithësi, 29 objekte fetare, 16 ndërtesa historike, katër muze dhe katër monumente u konfirmuan se ishin dëmtuar. Lista nuk përfshin informacione nga qyteti i rrethuar i Mariupol ose qyteti i Kherson, i cili është pushtuar nga Rusia.
Asnjë nga të dëmtuarit e konfirmuar nuk është në listën e vendeve të trashëgimisë botërore të UNESCO-s në Ukrainë, si Katedralja e Shën Sofisë ose ndërtesat e manastirit të Lavrës së Kyiv-Pechersk.
Megjithatë, qendra historike e Chernihiv është në listën tentative, që do të thotë se Ukraina dëshiron që ajo të konsiderohet për statusin e trashëgimisë botërore.
Në një letër të dërguar më 17 mars, një kopje e së cilës u sigurua nga AFP, drejtoresha e përgjithshme e UNESCO-s, Audrey Azoulay, i kujtoi ministrit të jashtëm rus, Sergei Lavrov, detyrimet e Rusisë për të mbrojtur trashëgiminë kulturore gjatë konfliktit sipas një konvente ndërkombëtare.
“Çdo shkelje e këtyre normave do t’i sjellë autorët para përgjegjësisë ndërkombëtare,” tha ajo, duke shtuar se UNESCO do të vëzhgojë nga afër gjendjen e trashëgimisë kulturore në Ukrainë.
Ministria e kulturës e Ukrainës foli të premten mbi të njëjtën temë, duke thënë se kishte regjistruar 135 raste të trupave ruse që kryenin krime kundër trashëgimisë kulturore të Ukrainës që nga fillimi i luftës, njoftoi agjencia e lajmeve Interfax-Ukraine.
Agjencia tha se krimet përfshinin shkatërrimin e një muzeu historik lokal në rajonin e Kievit, bombardimin e një teatri në Mariupol, një qytet port jugor i rrethuar nga Moska për gati një muaj dhe dëmtimi i një memoriali të Holokaustit në Kharkiv në Ukrainën lindore./21Media