Vance tregon kur e mori Trump vendimin final për sulme ndaj Iranit

Presidenti amerikan Donald Trump mori një vendim përfundimtar “disa minuta para se të hidheshin bombat” të shtunën, tha zëvendëspresidenti JD Vance.

Ai shtoi se presidenti amerikan “kishte aftësinë ta anulonte këtë sulm deri në minutën e fundit” dhe vendosi të vazhdonte.

SHBA tani po vëzhgon nga afër nëse Irani sulmon trupat amerikane apo vazhdon programin e tij të armëve bërthamore, tha Vance për NBC.

Ai sugjeroi që hapat e ardhshëm të Iranit do të bëhen të qartë brenda 24 orëve të ardhshme, duke përshkruar një “moment shumë delikat”.

Deri më tani, tha Vance, SHBA ka “marrë disa mesazhe indirekte nga iranianët”, pasi sekretari i Mbrojtjes Pete Hegseth tha më herët se ka “mesazhe publike dhe private që u dërgohen drejtpërdrejt iranianëve në kanale të shumëfishta”.

I pyetur se çfarë do të ndodhte nëse Irani do të mbyllë Ngushticën e Hormuzit, Vance tha se ky veprim “do të ishte vetëvrasës dhe do të shkatërronte ekonominë e tyre”.

Vance përsëriti se SHBA “nuk ka interes për trupa në terren” dhe hodhi poshtë shqetësimet se përfshirja e Uashingtonit zyrtar do të përshkallëzohej.