Vdekja e 4 turistëve rusë, Prokuroria ende asnjë të dyshuar, shkaqet mister

2 min read

Prokuroria pranë Gjykatës së Shkallës së Parë Kavajë e ka regjistruar vdekjen e katër turistëve në Kavajë si vrasje nga organi i akuzës.

Pavarësishtse kanë kaluar më shumë se një muaj, organi i akuzës nuk ka asnjë emër të dyshuar. Ndërsa, hetimet për zbulimin e shkaqeve që kanë çuar në humbjen e jetës së tyre po vijojnë, vdekja e tyre vijon të mbetet mister.

Ngjarja ka ndodhur më 15 tetor të këtij viti, ku 4 persona, që kanë pasur lidhje familjare, kanë vdekur në ambinentet e brendshme të një hoteli në Qerret të Kavajës. Pas vdekjes së rusëve që policia fillimisht ka thënë se janë asfiksuar brenda saunës, është përfolur për përdorim të lëndëve narkotike dhe alkolit, apo edhe helmimit me agjentë biologjikë.

“Kavajë, 25 nëntor 2021. Prokuroria Pranë Gjykatës së Shkallës së Parë Kavajë, ka regjistruar procedimin penal Nr. 448/2021, parashikuar në Nenin 79 “Vrasja në rrethana të tjera cilësuese” të Kodit Penal, për ngjarjen e ndodhur datë 15.10. 2021, me pasojë vdekjen e 4 shtetasve rusë në mjediset e SPA të hotel “Gloria Palace”. Në përgjigje të interesimit të medias informojmë opinionin publik se deri në këtë fazë të hetimit në dinamikë janë administruar një sërë aktesh e provash në funksion të çështjes të cilat janë në verifikim nga ana e prokurorisë. Janë marrë gjithashtu deklarimet e personave që kanë dijeni për veprën penale. Të gjitha këto prova po vlerësohen në raport me njëra-tjetrën për të përcaktuar dhe ecurinë e mëtejshme të hetimit. Duke kërkuar mirëkuptimin e medias dhe opinionit publik në ruajtjen e sekretit hetimor, sigurojmë angazhimin maksimal të prokurorisë në përfundimin e hetimeve në një kohë sa më shpejtë”, është bërë e ditur në njoftim./vizionplus