Vriten gjashtë persona dhe mbi 160 plagosen derisa po prisnin ndihma në Gaza
Gjashtë persona u vranë dhe më shumë se 160 të tjerë u plagosën ndërsa prisnin ndihmë në Gazën veriore në dy incidente të ndara të premten në mbrëmje dhe të shtunën në mëngjes, sipas mjekëve.
“Ekipet e Shërbimeve të Emergjencës dhe Ambulancës nxorën 133 persona të plagosur dhe gjashtë martirë nga ata që prisnin ndihmë në Rripin verior të Gazës”, thuhej në një deklaratë në grupin zyrtar të Telegram për shërbimet mjekësore në Gaza të premten vonë në mbrëmje, raporton CNN.
30 persona të tjerë u plagosën duke pritur për ndihmë në Gazën veriore të shtunën në mëngjes, tha e njëjta organizatë në një postim të mëvonshëm.
CNN ka kontaktuar ushtrinë izraelite në lidhje me dy incidentet.
Kombet e Bashkuara thonë se më shumë se 1,000 njerëz janë vrarë nga forcat izraelite ndërsa kërkonin ushqim që nga fundi i majit, kur një grup i ri kontrovers i ndihmës i mbështetur nga Izraeli dhe SHBA-të, Fondacioni Humanitar i Gazës, filloi të vepronte në Gazën jugore.
Sipas OKB-së, qindra prej tyre kanë vdekur pranë vendeve të GHF-së. Të tjerë kanë vdekur duke u përpjekur të marrin ndihma nga konvojet që vinin si në Gazën jugore ashtu edhe në atë veriore.
Mungesat në rritje të ushqimit në të gjithë Rripin e Gazës kanë bërë që mijëra njerëz të dëshpëruar të ecin distanca të gjata – shpesh natën – në përpjekje për të marrë ndihmë, shpesh duke u përballur me zjarr nga forcat izraelite.
Dëshiron ta dëgjosh këtë lajm me zë?