Ymeri i  bën ftesë publike LDK-së që para certifikimit të rezultateve të takohen

Ymeri i  bën ftesë publike LDK-së që para certifikimit të rezultateve të takohen

Kryetari i Vetëvendosjes Visar Ymeri, i ka bërë ftesë publike Lidhjes Demokratike të Kosovës që para certifikimit të rezultateve të takohen për të biseduar rreth formimit të Qeverisë së re.

Ymeri kërkoi që me zytarë të LDK-së të takohen me në krye Isa Mustafën pasi që tha se kanë shumë për të biseduar. Ymeri shtoi se kjo pritje është pengim i vetvetes e jo pengesë e sistemit nga tyre. “Le të takohemi e të flasim. Nga deklaratat publike të zyrtarëve të LDK-së me në krye z. Mustafa shihet se kemi aq shumë gjëra për të biseduar. Nuk është mirë të refuzohet dialogu. Unë po e ripërsëris thirrjen tonë për dialog. Është e pakuptimtë të presim çertifikimin përfundimtar të rezultateve për t’u takuar. Vetëm për një deputet në fund mund të ndryshojë përbërja e deputeteve të LV dhe LAA. Kjo pritje është pengim i vetvetes e jo pengesë e sistemit ndaj nesh. Në asnjë fushatë si kjo nuk është garuar në mënyrë të theksuar me kandidatë për Kryeministra. Populli ka vendosur me 11 pershor. Dhe, ka vendosur të ecim përpara. Jo të kthehemi prapa. Shihni votat e kandidatëve për kryeministra dhe deputetë, aty e gjeni popullin. LDK qëndrimin në opozitë e ka të sigurtë. Zotësia është të vijë në një qeveri ndryshe për ndryshime”, ka shkruar Ymeri në Facebook.

Ymeri  ka thënë se vota e qytetarëve duhet të reflektojë në qeverisjen e vendit, nderkohë që PDK-në e quan humbes.

“PDK humbi si qeverisje e korruptuar e përfshirë në krim, si qeverisje e koncesioneve ndaj Serbisë, si qeverisje që u përpoq t’i falë tokë Malit të Zi, si qeveri që e pamundësoi zhvillimin, nuk e integroi as territorin e as shoqërinë, e nxiti dhe mirëmbajti pabarazinë, e koncentroi pasurinë publike e shoqërore në duar të pakta oligarke e partiake. Secila votë kundër PAN është votë kundër të gjitha këtyre. Vota e qytetarëve duhet të reflektoj në qeverisjen e vendit. Kjo nuk bën të ndryshohet. Asnjë nga ne nuk kemi të drejtë ta përdhosim vullnetin e qytetarëve. Ambiciet personale duhen lënë anash. Për 3 vjet rresht qytetarët e kanë parë se si ka qeverisur Qeveria Mustafa. Për këto 3 vite na e kanë parë aksionin tonë politik, na kanë dëgjuar neve tek diskutojmë në Kuvend e në televizion. 10 ditë fushatë i kanë dëgjuar të gjitha premtimet e koalicioneve. E kanë dëgjuar edhe programin tonë siç i kanë ndjekur paraqitjet tona. Tash ata na treguan çfarë po mendojnë. Ejani t’i dëgjojmë. Ejani ta bëjmë ndryshimin. Ejani ta heqim Klanin Pronto siç kërkuan qytetarët. Ejani t’ia kthejmë Kosovës edhe Republikën edhe dinjitetin”, thuhet ndër tjerash në postimin e Ymerit./21Media