Zelensky: Do i ndëshkojmë të gjithë ata që kanë kryer mizori në tokën tonë

Presidenti i Ukrainës ka paralajmëruar trupat ruse se forcat e tij do të ndjekin deri në “varr” çdo ushtar që kryen krime lufte në territorin e Kievit.

Duke mbajtur fjalimin e tij të natës drejtuar popullit ukrainas nga Kievi, Volodymyr Zelensky iu drejtoi një mesazh trupave të Moskës, duke i paralajmëruar ata se do të përballeshin me “një ditë gjykimi” për “vrasje të qëllimshme” gjatë pushtimit të vendit të tij, transmeton rtv21.tv

“Sa familje si kjo kanë vdekur në Ukrainë? Ne nuk do të falim. Nuk do të harrojmë. Ne do të ndëshkojmë të gjithë ata që kanë kryer mizori në këtë luftë. Në tokën tonë,” tha Zelensky.

“Nuk do të ketë vend të qetë në këtë tokë për ju, përveç varrit”, shtoi ai.

“Duket se gjithçka që ushtarakët rusë kanë bërë tashmë nuk është ende e mjaftueshme për ta. Jo mjaft fate të shkatërruara. Jetë të gjymtuara. Ata duan të vrasin edhe më shumë.”

Zelensky u kërkoi gjithashtu udhëheqësve perëndimorë të ndërmarrin veprime më të forta kundër Moskës, duke u thënë atyre se “guximi i agresorit është një sinjal i qartë për Perëndimin se sanksionet kundër Rusisë nuk janë të mjaftueshme”./21Media