Zelensky mohon që Ukraina të ketë sulmuar Putinin ose Moskën

Presidenti i Ukrainës, Volodymyr Zelensky, ka mohuar se vendi i tij ka kryer një sulm të supozuar me dron në Kremlin, për të cilin Rusia thotë se ishte një përpjekje për të vrarë presidentin Vladimir Putin.

“Ne nuk sulmojmë Putinin apo Moskën. Ne luftojmë në territorin tonë. Ne po mbrojmë fshatrat dhe qytetet tona” tha ai, duke folur në një vizitë në Finlandë.

Zyra e presidentit rus tha se mbrojtjet rrëzuan dy drone gjatë natës.

Ajo kërcënoi se do të hakmerrej kur dhe ku e konsideronte të nevojshme.

Pamjet e paverifikuara që qarkullojnë në internet tregojnë tymin që ngrihet mbi Kremlin – një kompleks i madh qeveritar në qendër të Moskës – herët të mërkurën. Një video e dytë tregon një shpërthim të vogël mbi ndërtesën e Senatit të vendit, ndërsa dy burra duket se ngjiten lart në kube.

Presidenca ruse tha se Ukraina kishte tentuar të sulmonte rezidencën e Putinit në Kremlin dhe e përshkroi atë si “një akt të planifikuar terrorist dhe një atentat ndaj presidentit”.

Por Ukraina ka thënë se akuzat ruse janë thjesht një pretekst për sulme masive në territorin e saj dhe SHBA thotë se po i trajton pretendimet ruse me shumë kujdes.

Putin duket të jetë një nga udhëheqësit më të ruajtur në botë. Në ngjarjet e Putinit në Moskë ku morën pjesë gazetarë të BBC-së, siguria jashtëzakonisht e rreptë është vendosur, duke përfshirë kontrolle të gjera dhe kolona të gjata automjetesh me hapësirën ajrore të mbyllur dhe trafikun e ndaluar.

Megjithatë, nëse ajo që thotë Kremlini është e vërtetë, do të ngrejë pikëpyetje se sa i mbrojtur është në të vërtetë presidenti.

Do të ketë gjithashtu një kontroll mbi efektivitetin e mbrojtjes ajrore ruse. Në muajt e fundit, sistemet kundërajrore janë parë në çatitë e Moskës në afërsi të ndërtesave kryesore.

Ata janë vendosur atje sepse Kremlini është i shqetësuar se Ukraina, ose ata që janë dashamirës ndaj Ukrainës, mund të tentojnë të kryejnë sulme ajrore ndaj objektivave me vlerë të lartë./21Media