Bislimi ngushëllon familjet e të vrarëve nga sulmi në Beograd

Zëvendëskryeministri i Kosovës, Besnik Bislimi, u ka shprehur ngushëllime familjarëve të personave që sot humbën jetën si pasojë e sulmit të një 14-vjeçari në një shkollë në Beograd të mërkurën.

Bislimi gjithashtu u ka uruar shërim të shpejtë të plagosurve.

”Të shtënat në shkollë në Beograd këtë mëngjes ishin tragjike dhe tronditëse. Asgjë nuk mund të justifikojë veprime të tilla. I shpreh ngushëllimet e mia familjeve të viktimave, duke u uruar gjithashtu shërim të shpejtë të plagosurve”, ka shkruar Bislimi në Twitter.

14-vjeçari serb që vrau nëntë persona të mërkurën në mëngjes në një shkollë fillore në Beograd planifikoi sulmin për një muaj. Policia ka konfirmuar se përveç autorit, në pranga ka përfunduar edhe babai i tij.

Sipas BBC-së, 14-vjeçari ka përpiluar listën se cilët nxënës do t’i vrasë dhe në cilën klasë do të futej. Ai madje kishte planin se si të futej dhe të dilte nga shkolla “Vladislav Ribnikar” pas sulmit. Autori pati katër koktej molotovi në çantë.

14-vjeçari vrau tetë studentë dhe rojën e shkollës. Plagosi shtatë persona të tjerë, përfshirë një mësues historie, me të cilin raportohej se nuk kishte marrëdhënie të mira.

Policia serbe ka konfirmuar se djaloshi ka gjuajtur me dy pistoleta, për të cilat babai i tij kishte leje. Por sipas raporteve jozyrtare, babai e kishte mësuar të gjuante me armë në një poligon djalin e tij. Për këtë po hetohet dhe është arrestuar./21Media

The school shooting in Belgrade this morning was both tragic and shocking. Nothing can justify such actions. I express my condolences to the families of the victims, wishing also a speedy recovery to the wounded.

— Besnik Bislimi (@BislimiBesnik) May 3, 2023