Ahmeti: Nuk do ta ndihmojmë PDK-në që ta rrëzojë qeverinë për taksën

Ahmeti thotë se PSD-ja mbështet taksën

Kryetari i Partisë Socialdemokrate, Shpend Ahmeti, ka mohuar zërat për bashkëqeverisje të mundshme me LDK-në. Ai ka theksuar se nuk ka pasur ndonjë takim me LDK-në lidhur me këtë gjë. Ahmeti është shprehur se PSD-ja mbështet taksën.

“Po lexoj nëpër media se analistët po thonë se e parashikojnë prishjen e koalicionit, dhe qeveri të re (pa zgjedhje) me LDK dhe PSD. Përderisa për LDK-në nuk mund të flas, sa i përket PSD-së, mund të konfirmoj se nuk ka pas as edhe një takim apo diskutim për këtë gjë. Ne kemi dhënë dhe vazhdojmë të japim mbështetje politike për taksën dhe jemi pjesë e delegacionit shtetëror për dialogun. I kemi thënë edhe LDK-së e VV-së, se nuk do ta ndihmojmë Listën Serbe për ta rrëzuar Qeverinë për shkak të taksës”, ka thënë ai.

Ai i është drejtuar Partisë Demokratike duke i thënë se nuk do ta ndihmojnë PDK-në për rrëzimin e qeverisë për shkak të taksës.

“Tani i themi edhe PDK-së se me ndihmën tonë nuk do ta rrëzojnë e as kërcënojnë AAK-në – si presion ndaj Kryeministrit për ta larguar taksën. Vazhdojmë të mbajmë qëndrimin që për taksën duhet të merret vendimi i përbashkët, ku edhe presionin edhe kritikat do t’i bartim bashkë. Taksa është e drejtë dhe është vendimi i parë pas të gjitha sulmeve që ka bërë Serbia ndaj nesh. Ne jemi të interesuar të dialogojmë me Serbinë sipas platformes që kemi aprovuar, por Qeveria ka të drejtë të merr vendime për ta mbrojtur interesin e shtetit tonë.”, ka shkruar Ahmeti në Facebook.

Ai po ashtu ka shtuar se Dialogu me Serbinë është çështje e rëndësishme për Kosovën. “Prandaj, vendimet për të duhet të synojnë përherë koncensualitet dhe të përfshijnë të gjithë ata që janë të interesuar ta ndihmojnë Kosovën. Protagonizmi e personalizimi i këtij procesi as nuk është i mundshëm dhe do të ishte tejet i dëmshëm.”, ka përfunduar Ahmeti./21Media