BERZH zotohet për mbështetje të mëtutjeshme

Vlerësohet lartë bashkëpunimi i Bankës me institucionet e Kosovës

Ministri i Financave, Bedri Hamza, ka pritur sot në takim drejtoreshën për Ballkanin Perëndimor të Bankës Evropiane për Rindërtim dhe Zhvillim (BERZH), Zsuzsanna Hargitai, ku diskutuan në lidhje me bashkëpunimin në mes të Qeverisë së Kosovës dhe BERZH-it.

Siç bëhet e ditur në komunikatën për media të Ministrisë, Hamza ka theksuar se BERZH-i paraqet njërin ndër partnerët kryesor për Kosovën, për realizimin e projekteve me rëndësi. Ministri ka theksuar rëndësinë e mbështetjes së Bankës për sektorin privat dhe ka inkurajuar Bankën për mbështetje të vazhdueshme të këtij sektori.

“Sektori privat është bartës kryesor i zhvillimit dhe rritjes ekonomike në vend andaj mbështetja e Bankës është e domosdoshme për të arritur këtë qëllim. Sa i përket sektorit publik ky vit pritet të jetë vit i realizimit të projekteve për të cilat konstruksioni financiar është i siguruar.”, ka shtuar Hamza.

Ndërsa, drejtoresha e BERZH-it, Zsuzsanna Hargitai, ka vlerësuar lartë bashkëpunimin e Bankës me institucionet e Kosovës dhe shtoi se për projektet me rëndësi strategjike mbështetja e BERZH-it nuk do të mungojë. Ajo gjithashtu ka theksuar se BERZH-i, do të vazhdojë të ofrojë mbështetje për sektorin privat dhe publik përmes formave të ndryshme të asistencës./21Media