Është ulur kontrabanda me drogë dhe telefona në burgjet e Kosovës

Thaçi ka folur edhe për suspendimin e disa zyrtarëve korrektues

Gjatë vitit që lëmë pas janë arrestuar tetë zyrtarë korrektues, ndërsa në proces të hetimeve është një numër shumë i madhi i tyre, ka njoftuar drejtori i Shërbimit Korrektues të Kosovës, Nehat Thaçi, i cili e ka pranuar se nëpër burgjet po vazhdon të ketë kontrabandë me substanca narkotike e përdorim të telefonave.

Sipas tij, në vitin 2020, do të hapet ferma e pulave dhe një fabrikë e ujit, ku do të angazhohen shumë të burgosur, ndërkohë ka theksuar se është arritur të rehabilitohen të burgosurit dhe të marrin profesione të ndryshme.

Në Qendrat Korrektuese në Kosovë janë rreth 1800 persona të cilët janë duke mbajtur dënimin për vepra të caktuara.

Thaçi në një intervistë për Kp ka deklaruar se gjatë vitit 2019 kanë ngritur kapacitetin për bashkëpunim me institucionet tjera, siç janë Policia e Kosovës dhe agjencionet tjera të sigurisë. Ai është zotuar se si Shërbim Korrektues i Kosovës kanë ulur shpenzimet për një milion euro gjatë vitit që lëmë pas, duke rehabilituar të burgosurit.

“Duke kursyer këtë buxhet, ne kemi arritur që të rehabilitojmë të burgosurit dhe t’iu japim profesione të ndryshme për shkak se të gjitha punimet dhe renovimet që janë kryer në objektet tona, janë kryer nga të burgosurit, të cilët fillimisht janë trajnuar për atë punë e pastaj i kanë përfunduar këto trajnime. Që në dy fushat mjaft mirë kemi përfunduar. Karakterizohet Shërbimi Korrektues për marrëdhënie ndër-rajonale që i kemi drejtuar me shtetin fqinj”, ka thënë ai.

Thaçi ka pohuar se në burgjet e Kosovës po vazhdon të ketë kontrabandë me substanca narkotike, e po ashtu edhe me përdorimin e telefonave, e në raste të tilla sipas tij, masat e ndëshkimit janë të mëdha si për të burgosurit, ashtu edhe për zyrtarët korrektues të cilët po e mundësojnë kontrabandën.

“Ne kohë pas kohe bëjmë bastisje të shumta, arrijmë të kapim kontrabanda të ndryshme, sidomos te vizitorët, familjarët kur të vijnë në vizitë tek të burgosurit e tyre, ne shpesh hasim në bashkëpunim me Policinë e Kosovës dhe Njësitin e Intelegjencës që e kemi, që të marrim informacione. Po është e vërtetë që ende kemi kontrabandë por jo në masën siç ka qenë më herët. Kur është në pyetje telefoni, ne në shumicën e burgjeve tashmë e kemi të instaluar kamerat apo ndaluesin e valëve, prandaj në shumicën e vendeve telefoni është i pa përdorshëm”, ka shtuar ai.

Ai ka folur edhe për suspendimin e disa zyrtarëve korrektues, sipas të cilit ka pasur dyshime që kanë qenë të involvuar në kontrabandë.

“Ka pas prej ikjeve të burgosurve deri tek keqpërdorimi ku ka pasur dyshime që zyrtarët korrektues kanë qenë të involvuar në kontrabandë…Tash është një proces hetimor ku nuk kisha dashur të komentojë për shkak se nuk kemi ende një verdikt final të gjykatës, nëse flas më shumë mund t’i lëndoj dy pjesë edhe procesin e hetimit, edhe të individi i cili është cak i këtyre hetimeve… të arrestuar kanë qenë tetë, ndërsa në proces të hetimeve është një numër shumë i madh”, ka theksuar ai.

Këshilli për Mbrojtjen e të Drejtave e të Lirive të Njeriut, disa herë kishte ripërsëritur kërkesën se duhet të ndërtohet një spital brenda sistemit të burgjeve.

Pavarësisht kësaj, Thaçi ka shtuar se shërbimet shëndetësore në burgje janë të mira, derisa ai nuk i arsyeton ankesat e të burgosurve. Drejtori i burgjeve të Kosovës ka theksuar se gjatë vitit 2020 presin që të aprovohet Ligji për Shërbimin Korrektues.

Derisa në Kuvendin e Kosovës, vitin e kaluar është diskutuar për kthimin e pakove ushqimore, Thaçi ka shtuar se në këtë mënyrë do të motivohen të burgosurit për keqpërdorim e kontrabandë. Ai është zotuar se në vitin 2020, do të hapet ferma e pulave dhe fabrika e ujit ku do të angazhohen të gjithë të burgosurit.