​Kurti: Nuk jemi të qetë përderisa nuk ka drejtësi për Astritin

Kryeministri i Kosovës, Albin Kurti së bashku me kryeparlamentarin, Glauk Konjufca, ministra, deputetë e anëtar të Lëvizjes Vetëvendosje, si dhe familjarë, sot bënë homazhe te varri i aktivistit Astrit Dehari, i cili pesë vjet më parë u gjet i vdekur në qendrën e paraburgimit në Prizren.
Turmës të atyre që kishin ardhur për të bërë homazhe i printe vajza e të ndjerit, Arsa e cila në dorë mbante një lule që e vendosi te varri i babait të saj, ndërsa veshur kishte një bluzë me figurën e Astrit Deharit.
Kurti tha nuk janë të qetë përderisa nuk ka drejtësi për Astritin.
“Sot janë mbushur 5 vjet pa Astritin, me shumë mall, dashuri e krenari e kujtojmë për punën e angazhimin, kontributin dhe sakrificën e tij. 5 vjet pa Astritin janë edhe 5 vjet pa drejtësi për Astritin. Ai u mbyt në burgun e Prizrenit me 5 nëntor 2016, dhe sot e kësaj ditë ne nuk mund të jemi të qetë përderisa nuk ka drejtësi për Astritin, përderisa përgjegjësit nuk janë gjykuar e dënuar dhe nuk është zbardhur në plotni e vërteta për të vërteta për të. Astritin e kemi pasur shok të ngushtë, i cili ka qenë shembull për aktivizimin, dashamirisinë dhe organizimin që ka bërë. Ne ja kemi borxh edhe Astritit dhe qytetarëve drejtësinë për Astritin. Duhet të bëjmë reforma të thella në sistemin e drejtësisë, edhe për viktimat e krimeve të kryera të kryera gjatë luftës nga Serbia , edhe për viktimat krimit politik, çfarë ishte mbytja e Astritit në burg”, tha Kurti.
Babai i Astritit, Avni Dehari, kërkoi nga prokuroria që sa më parë ta zbardhin vrasjen e djalit të tyre.
“Unë veç i mbështes këto fjalë dhe t’i falënderojë të gjithë të pranishmit në këtë përvjetor të rënies së Astritit dhe njëherë i t’i drejtohem Prokurorisë në emër të familjes dhe gjithë pranishmëve që mos t’i zvarrisë rastet siç i kanë zvarritur deri tash, dhe ta zbardhin këtë rast dhe të gjitha rastet që duhet të zbardhen në Kosovë”, tha Dehari.
Në pesë vjetorin e vdekjes së ish aktivistit, Astrit Deharit janë organizuar edhe disa aktivitete. Përveç homazheve në orën 12:00 do të mbahet akademi përkujtimore, në orën 15:30 do të dhurohet gjak në kujtim të tij, ndërsa nga ora 20:00 është bërë ftesë që të ndizen qirinj në shtëpitë e të gjithë qytetarëve në nderim të Astrit Deharit.
Më 5 nëntor të vitit 2016 brenda qelisë së tij në Qendrën e Paraburgimit në Prizren ishte gjetur i vdekur aktivisti i LVV-së, Astrit Dehari, i cili aty po qëndronte nën dyshimet se ka qenë një nga gjashtë personat që mori pjesë në sulmin me granatahedhëse në Kuvendin e Kosovës.