SHBA thellësisht e shqetësuar për moscertifikimin e Listës Serbe

Pas moscertifikimit të Listës Serbe ka reaguar Ambasada e Shteteve të Bashkuara të Amerikës në Prishtinë.

Ata janë shprehur të shqetësuar se ky veprim i Komisionit Qendror të Zgjedhjeve mund të dëmtojë zgjedhjet e lira, shkruan gazeta online Reporteri.net.

“Jemi thellësisht të shqetësuar me veprimet e disa anëtarëve të Komisionit Qendror Zgjedhor (KQZ) për të mos certifikuar kandidatët e Listës Srpska. Veprimet e KQZ-së rreptësisht duhet të kufizohen në zbatimin e standaredeve dhe procedurave ligjore dhe çdo vendim për moskualifikimin e kandidatëve duhet të bazohet vetëm në zbatim të barabartë të ligjit. Procesi zgjedhor duhet të jetë transparent, i besueshëm dhe pa ndërhyrje politike.”, thuhet në reagimin e Ambasadës së SHBA-së.

Në reagim thuhet se veprime të tilla dëmtojnë parimet themelore demokratike të zgjedhjeve të lira dhe të ndershme, meqenëse ia çelin derën ndikimit subjektiv politik mbi procesin zgjedhor.