Aksioni i policisë në Pejë ku u konfiskua drogë dhe armë, i dyshuari ndalohet për 48 orë
Nga aksioni i Policisë së Kosovës mbrëmjen e djeshme në Pejë janë konfiskuar një sasi droge rreth një kilogram dhe dy armë. Personi i dyshuar ditën e sotme është paraqitur në stacionin policor.
Zëdhënësi i Prokurorisë së Pejës, Shkodran Nikçi, për portalin rtv21.tv ka thënë se i dyshuari me urdhër të prokurorit do ndalohet për 48 orë.
“I dyshuari për rastin e djeshëm për rreth 1 kilogram substancë narkotike dhe dy armë zjarri është paraqitur sot në Stacionin Policor. I dyshuari me urdhër të prokurorit do ndalohet për 48 orë, ndërkaq brenda afatit ligjor do parashtrohet kërkesë për sigurimin e të pandehurit në procedurë penale”, ka thënë Nikçi. /21Media