Krasniqi-Kusarit: Në VV je mish i huaj, deri ta kalon provimin te Albini

 

Shefja e Grupit Parlamentar të VV-së, Mimoza Kusari-Lila sot për tensionet ndërmjet deputetëve të PDK-së dhe VV-së në Kuvend ka fajsuar opozitën duke thënë se akuzat dhe fyerjet e tyre ishin të rënda.

Ajo gjatë një konference për media ka thënë se deputeti i PDK-së, Memli Krasniqi ka sharë dhe ofenduar deputetët. Lidhur me këtë ka reaguar Krasniqi duke thënë se Mimoza Kusari-Lila ka shpifur kundër tij.

“Mimoza Kusari-Lila, kjo zëdhënëse e përjetshme e pushtetit, duke u munduar qe ta heqë vëmendjen prej tentimit të sotëm të grupit të saj për ta heshtur dhunshëm opozitën në Kuvend, e besa edhe për të na sulmuar fizikisht, paska shpifur kundër meje, se kinse e paskam ofenduar atë dhe koleget e saj. Siç ndodh rëndom, të ligët kur s’kanë argumente, shpifin. Përveç nëse Mimoza ofendohet nga fjala “analfabet”. Nëse po, atëherë vërtet e paskam “ofenduar” ministren Shwartz. Sepse, ajo është absolutisht analfabete funksionale në lëmin e diplomacisë, gjë që po e shpërfaq çdo ditë në mënyrën më të turpshme, duke e goditur çdo vlerë të popullit e të shtetit tonë, sikur të ishte ministre e Serbisë, e jo e Kosovës”, ka reaguar Krasniqi.

Tutje deputeti i PDK-së ka thënë se Kusari-Lila “i dhimbset pak”, por këtë po e bën për “ta kaluar provimin tek Albin Kurti”.

“Në LVV ajo është mish i huaj dhe po bën përpjekje titanike që të dëshmojë lojalitet e militantizëm, ani pse ende nuk ia kanë besuar as pozitën e Shefes së Grupit Parlamentar, duke e mbajtur vetëm si “ushtruese të detyrës” tash e gati dy muaj. Andaj, le ta ushtrojë këtë detyrë derisa ta kalojë provimin tek Albin Kurti, por mirë bën që të provojë ta ruajë dinjitetin e saj gjatë kësaj rruge”, ka thënë ai./21Media