Bie në kontakt me rrymën, humb jetën një 45-vjeçare

Një grua humbi tragjikisht jetën mëngjesin e kësaj të mërkure pasi ra në kontakt me energjinë elektrike.

Ngjarja ndodhi në Maminas. Në një njoftim zyrtar për mediat, policia e Durrësit thotë se viktima është një 45-vjeçare, e cila mbërriti në urgjencën e spitalit pa shenja jete rreth orës 08:20 të mëngjesit.

Rrethanat e ngjarjes së rëndë momentalisht mbeten të paqarta. Për ndriçimin e tyre po punon një grup hetimor.

“Rreth orës 08:20, në Urgjencën e Spitalit Rajonal Durrës, është dërguar pa shenja jete, shtetasja O. Gj., 45 vjeçe, banuese në Maminas. Nga veprimet paraprake hetimore dyshohet se kjo shtetase ka humbur jetën pasi ka rënë në kontakt me rrymën elektrike, në banesën e saj. Grupi hetimor po punon për sqarimin e rrethanave të ngjarjes”, njofton policia./oranews