Aktakuzë kundër një shtetasi të Shqipërisë për dhënie të ryshfetit

Me 9 dhjetor Policia e Kosovës ka arrestuar një shtetas të Shqipërisë me arsyetimin se personi i ka ofruar ryshfet për mos posedim të vërtetimit të vaksinimit të plotë kundër COVID-19.
A.B në mënyrë të drejtpërdrejtë siç njofton Prokuroria Themelore ofroi dhuratë të paarsyeshme apo përfitim tjetër, personit zyrtar në mënyrë që ai person të veprojë ose të mos veprojë në pajtim me detyrën e tij zyrtare, ashtu që gjatë kalimit të pikës kufitare të Vërmicës derisa ishte duke udhëtuar me automjetin “Audi A4”me targa regjistrimi të Republikës së Shqipërisë, së bashku me dy pasagjerë të tjerë, i pandehuri në momentin kur afrohet për kontroll, duke ditur që nuk ka certifikatë të vaksinimit, në lejen e qarkullimit të automjetit i vendos tri kartëmonedha prej dhjetë euro gjithsej tridhjetë euro, të cilat ia jep zyrtarit policor A.Sh., e në momentin kur zyrtari policor i vëren paratë dhe e pyet se për çfarë janë këto para, i pandehuri përgjigjet se paratë i ka lënë për të, për respekt ndaj tij , dhe se nuk kanë certifikatë vaksinimi e as test PCR për Covid-19, nëse ka mundësi që tu lejohet hyrja në Kosovë.
Prokuroria Themelore në Prizren, Departamenti i Krimeve të Rënda, ka ngritur aktakuzë kundër të pandehurit A.B.,shtetas i Shqipërisë i cili gjendet nën masën e paraburgimit nga data 10.12.2021 për shkak të dyshimit të bazuar mirë se ka kryer veprën penale “Dhënia e ryshfetit”nga neni 422 paragrafi 1 Kodit Penal të Republikës së Kosovës (KPRK).
Prokurori i çështjes me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, i pandehuri i lartëcekur për veprën penale për të cilën akuzohet të shpallet fajtorë dhe të dënohet sipas ligjit.​/21Media 

Back to top button