Arrestohen dy burra në Ferizaj, njëri rrah gruan e tjetri motrën

Në dy raste të ndara, dje janë arrestuar dy persona për dhunë në familje në rajonin e Ferizajt.
Sipas Policisë, rreth orës 19:00, kanë pranuar një informacion se në fshatin Talinovc i Muhaxherëve të Ferizajt është një rast i dhunës në familje.
“Në lidhje me këtë policia e stacionit në Ferizaj, konkretisht Njësia e Dhunës në Familje menjëherë i kanë marrë veprimet e nevojshme, kanë dalë në vendin e ngjarjes dhe kanë arrestuar personin B.M (M/K) i moshës 33 vjeçar,  i cili shkak i një mosmarrëveshje në familje e kishte sulmuar bashkëshorten e tij D.M (F/K) e moshës 32 vjeçare, duke i shkaktuar lëndime trupore, e cila më pas kishte pranuar tretman mjekësor”, bëhet e ditur në njoftim.
Ndërsa, mbrëmë rreth orës 21:00 është raportuar një rast tjetër i dhunës në familje në rrugën “Safet Berisha” në Ferizaj.
“Sektori Rajonal i Dhunës në Familjje menjëherë i kanë marrë veprimet e nevojshme, kanë dalë në vendin e ngjarjes dhe kanë arrestuar personin I.T (M/K) i moshës 25 vjeçar,  i cili shkak i një mosmarrëveshje, i kishte shkaktuar dhunë fizike dhe psiqike motrës së tij S.T (F/K) e moshës 28 vjeçare”, njofton Policia e Kosovës.
Policia të dyshuarit, në të dy rastet i ka shoqëruar në stacionin e policisë në Ferizaj dhe pas intervistimit nga policët hetues të dhunës në familje, me vendim të Prokurorit nga Prokuroria Themelore në Ferizaj, të njëjtit janë  dërguar në mbajtje për 48 orë, për procedura të mëtejme hetimore./21Media