Berisha: Dështoi projekti serb për ndarjen e Kosovës
Me dështimin e nismës së “Ballkanit të Hapur”, ka dështuar projekti serb për ndarjen e Kosovës nga Serbia, kështu ka thënë Ish-presidenti dhe ish-kryeministri i Shqipërisë, Sali Berisha.
Në një postim në Facebook, Berisha ka shkruar se ideja për Ballkanin e Hapur, e nisur nga presidenti serb, Aleksandar Vuçiq dhe kryeministri i Shqipërisë, Edi Rama, pati plan zhdukjen e Kosovës si shtet i pavarur dhe të paraqitej si pjesë integrale e Serbisë së Madhe.
“Qëllim tjetër madhor i Ballkanit të Hapur ishte të kundërshtonte Procesin e Berlinit të BE. Ky i fundit krejt ndryshe nga Ballkani i Hapur, që stabilitetin e Ballkanit e bazonte në parimin e vjetër të hegjemonizmit serb në rajon, konsideron të domosdoshëm për stabilitetin e rajonit bashkëpunim rajonal të shteteve sovrane dhe të barabarta të tij. Ballkani i Hapur u mbështet që në fillim fort nga Lavrov, i cili me urrejtje e quante nismën e Berlinit si Ballkani i mbyllur i Brukselit dhe nxiste fuqishëm trojkën Vuçiç-Rama- Zaev të zëvendësonin Procesin e Berlinit të BE me projektin e hegjemonisë serbe dhe nëpërmjet saj, asaj ruse në rajon. Por projekti i vendosjes së hegjemonisë serbe u mbështet fuqishëm edhe nga Alexander Soros, i cili në çdo takim të aleancës trilaterale destabilizues paraqitej si padrino i takimit dhe lobonte fuqishëm në vendin e tij, por edhe në vende të tjera për mbështetjen e Ballkanit të Hapur në kundërshtim me interesat perëndimore në rajon”, ka shkruar Berisha ndër tjera.
Sipas Berishës, kryeministri Rama, në emër të këtij projekti, e mbronte me fanatizëm refuzimin e Beogradit për zbatimin e sanksioneve të BE dhe NATO-s, ndaj Rusisë dhe kthimin e Serbisë në prapavijë të Rusisë agresore e Ukrainës./21Media