Bislimi për postën serbe: Ky veprim do të duhej të mbështetej edhe nga aleatët

Zëvendëskryeministri i Kosovës, Bensik Bislimi, ka reaguar lidhur me vendimin e institucioneve të Kosovës për mbylljen e pikave të postës serbe në Veri të vendit.

Në një postim në Facebook, Bislimi ka thënë se një veprim i tillë është ndërmarrë pasi janë siguruar informacione nga ARKEP se në territorin e Kosovës po veprojnë operatorë ekonomikë pa licencë dhe që s’janë të regjistruar në ARBK.

Sipas Bislimit se posta serbe ka vepruar ilegalisht në territorin e Republikës së Kosovës dhe se veprimet e djeshme nga Policia janë në shërbim të mbrojtjes së sundimit të ligjit, konkurrueshmërisë dhe kushtetutshmërisë së vendit.

”Republika e Kosovës punon çdo ditë që t’i përafrohet standardeve, vlerave e parimeve më të larta të Bashkimit Evropian. Përmes Marrevëshjes së Stabilizim-Asocimit që Kosova e ka me BE-në, ne si shtet obligohemi që sipas neneve 74, 75, 91, 94, 96 dhe 99, të ndërtojmë dhe praktikojmë ekonominë e tregut të lirë, t’i përmbahemi rregullave të mbrojtjes së konkurrueshmërisë në treg si dhe ndalimit, parandalimit dhe luftimit të aktiviteteve të tjera ilegale. Për më tepër, parakushtet kryesore për t’u anëtarësuar në Bashkimin Evropian janë drejtësia, sundimi i ligjit dhe mbrojtja e respektimi i tyre. Një entitet i Serbisë, në këtë rast Posta e Serbisë, ka operuar jashtëligjshëm jashtë territorit të Serbisë, e për më tepër në një shtet të cilin ajo nuk e njeh. Prezenca e këtyre zyrave në territorin e Republikës së Kosovës përveçse paraqet shkelje të rëndë të parimeve të fqinjësisë së mirë, ato gjithashtu përbëjnë aktivitet ilegal, shkaktojnë çrregullim tregu, dhe prishjen e konkurrencës. Fakti që çështja e shërbimeve postare është konsideruar si diskutim për të ardhmen në marrëveshjet e kaluara të viteve 2013 dhe 2015, nuk nënkupton që në ndërkohë Posta e Serbisë të vijojë operimin ilegal në vend, të shkelë të gjitha rregullat, ligjet dhe Kushtetutën e Republikës së Kosovës. Asgjë nuk nënkupton të drejta, apo tolerim të entiteve ilegale në vend. Kjo asesi nuk mund të jetë e pranueshme dhe e lejueshme për shtetin tonë, e parimisht nuk do të duhej të ishte e pranueshme as nga ana e Bashkimit Evropian”, ka shkruar Bislimi.

Në fund, Bislimi ka pasur kritika edhe për BE-në dhe reagimin e bërë ndaj veprime të Kosovës, duke thënë se Brukseli po ka gatishmëri më të madhe për të reaguar dhe për të dënuar veprimet e Kosovës dhe për t’u kthyer tek çështjet teknike të dialogut sesa të merret me Serbinë dhe mohimin dhe shkeljen që Beogradi po ia bën marrëveshjes së arritur./21Media