Biznesmeni më i pasur i Rusisë i thotë Putinit: Mos na kthe në vitin 1917
Biznesmeni më i pasur rus paralajmëroi Kremlinin kundër konfiskimit të aseteve të kompanive që kanë ikur pas pushtimit të Ukrainës dhe tha se një hap i tillë do ta kthente vendin pas më shumë se 100 vjetësh.
Vladimir Potanin, president i gjigantit të metaleve Norilsk Nickel (NILSY) deklaroi se Rusia rrezikonte të kthehej në ditët e trazuara të revolucionit të vitit 1917 nëse u përplas derën kompanive dhe investitorëve perëndimorë. Ai i kërkoi qeverisë ruse të vazhdojë me kujdes ekstrem në lidhje me sekuestrimin e aseteve.
“Së pari, do të na kthente njëqind vjet mbrapa, në 1917, dhe pasojat e një hapi të tillë – mosbesimi global ndaj Rusisë nga ana e investitorëve – do t’i përjetonim për shumë dekada”, tha ai në një mesazh të postuar.
“Së dyti, vendimi i shumë kompanive për të pezulluar operacionet në Rusi është, do të thosha, disi emocional në natyrë dhe mund të jetë marrë si rezultat i presionit të paprecedentë ndaj tyre nga opinioni publik jashtë vendit. Pra, ka shumë të ngjarë që ata të kthehen. Dhe Unë personalisht do ta mbaja një mundësi të tillë për ta”, shtoi ai.
Potanin është miliarderi më i pasur i Rusisë dhe ka ende rreth 22.5 miliardë dollarë, sipas Bloomberg, pavarësisht se humbi rreth një të katërtën e pasurisë së tij këtë vit pasi aksionet e Norilsk Nickel ranë. Aksionet e kompanisë humbën më shumë se 90% në tregtimin në Londër përpara se të pezulloheshin këtë muaj, pavarësisht rritjes së çmimeve për mallrat e saj.
Norilsk Nickel është prodhuesi më i madh në botë i paladiumit dhe nikelit të cilësisë së lartë, si dhe një prodhues i madh i platinit dhe bakrit. Kompania dhe produktet e saj kryesore i kanë shpëtuar sanksioneve ndëshkuese të vendosura nga vendet perëndimore që kanë goditur ekonominë ruse, shkruan CNN, përcjell rtv21.tv
Dhjetra kompani amerikane, evropiane dhe japoneze kanë braktisur sipërmarrjet e përbashkëta, fabrikat, dyqanet, zyrat dhe asetet e tjera në dy javët e fundit në përgjigje të pushtimit rus të Ukrainës. Atyre iu kanë bashkuar Goldman Sachs dhe JPMorgan të enjten, bankat e para të mëdha perëndimore që kanë njoftuar se do të largohen plotësisht nga Rusia.
Presidenti rus, Vladimir Putin tha të enjten se ai mbështet një plan për të futur “menaxhimin e jashtëm” të kompanive të huaja që largohen nga Rusia.
“Ne duhet të veprojmë me vendosmëri me ato [kompani] që do të mbyllin prodhimin e tyre”, tha Putin sipas një video të postuar nga Kremlini dhe të transmetuar në mediat shtetërore. “Është e nevojshme, atëherë… të futet menaxhmenti i jashtëm dhe më pas të transferohen këto ndërmarrje tek ata që duan të punojnë”, shtoi ai.
Organizata ruse për të drejtat e konsumatorit ka hartuar një listë të kompanive që kanë vendosur të largohen dhe mund të shtetëzohen, sipas një raporti të gazetës ruse Izvestiya, të cituar më vonë nga agjencia shtetërore e lajmeve TASS. Dokumenti që thuhet se i është dërguar qeverisë ruse dhe Prokurorisë së Përgjithshme, përfshin 59 kompani, duke përfshirë Volkswagen, Apple, IKEA, Microsoft, IBM, Shell, McDonald’s, Porsche, Toyota, H&M dhe mund të përditësohet me më shumë marka.
Potanin tha se nuk ishte veçanërisht e përshtatshme të flitej për shtetëzimin e aseteve perëndimore, por propozimi i Kremlinit mund të lejojë “pronarët të mbajnë pronën dhe kompanitë të shmangin kolapsin, të vazhdojnë të prodhojnë produkte dhe të paguajnë para për punonjësit”.
“Unë e kuptoj se në dritën e kufizimeve ekonomike të drejtuara kundër Rusisë, mund të ketë një dëshirë të kuptueshme për të vepruar në mënyrë simetrike. Por në shembullin e vendeve perëndimore, ne shohim se ekonomitë e këtyre vendeve vuajnë nga vendosja e sanksioneve kundër Rusisë. Ne duhet të jemi më të mençur dhe të shmangim një skenar ku sanksionet hakmarrëse godasin veten tonë.”, shkroi ai.
Ai gjithashtu bëri thirrje që Rusia të lehtësojë kufizimet ndaj valutës së huaj në mënyrë që të mund të paguhet interesi për obligacionet dhe huatë e huaja. Përndryshe, ekzistonte rreziku që vendi mund të falimentonte të gjithë borxhin e tij të jashtëm, të cilin ai e vlerësoi në rreth 480 miliardë dollarë./21Media