Çmimet e naftës rriten me rritjen e tensioneve Ukrainë-Rusi
Çmimet e naftës po rriten nga frika se kriza Ukrainë-Rusi do të prishë zinxhirët e furnizimit në të gjithë botën.
Çmimi i naftës së papërpunuar Brent ka arritur në 97.44 dollarë për fuçi të martën në nivelin më të lartë në shtatë vjet, pasi Rusia ka urdhëruar trupa në dy rajone të kontrolluara në lindje të Ukrainës.
Mbretëria e Bashkuar dhe disa aleatë perëndimorë kanë kërcënuar me sanksione ndaj Rusisë.
Vendi është eksportuesi i dytë më i madh i naftës pas Arabisë Saudite, shkruan BBC, përcjell rtv21.tv
Është gjithashtu prodhuesi më i madh në botë i gazit natyror.
Rusia ka thënë se trupat e saj do të angazhohen në “ruajtjen e paqes” në republikat e vetëshpallura popullore Donetsk dhe Luhansk. Por, Shtetet e Bashkuara kanë thënë se t’i quash ata paqeruajtës është “marrëzi” dhe se Rusia po krijon një pretekst për luftë.
Kriza Ukrainë-Rusi mund të ketë “implikime thelbësore”, ka thënë Sue Trinh nga Manulife Investment Management.
Sanksionet që detyrojnë Rusinë të furnizojë më pak naftë ose gaz natyror do të kenë “ndikim të rëndësishëm në ekonominë globale”, ka shtuar ajo.
Maike Currie, drejtoreshë e investimeve në Fidelity International, ka deklaruar se nafta mund të shkojë mbi 100 dollarë për fuçi për shkak të krizës në Ukrainë, dimrit të ftohtë në SHBA dhe mungesës së investimeve në furnizimet me naftë dhe gaz në mbarë botën.
“Rusia përbën një në çdo 10 fuçi naftë të konsumuar globalisht, kështu që ajo është një lojtar kryesor kur bëhet fjalë për çmimin e naftës, dhe sigurisht, do të dëmtojë vërtet konsumatorët në pompat e benzinës”, ka thënë ajo.
Ka pasur sanksione të SHBA-së dhe BE-së ndaj Rusisë për disa vjet, gjë që ka pasur një “ndikim masiv” në ekonominë ruse./21Media