Dënimi i dytë për Serbinë nga FIFA, Çeku: Ankesa ishte bërë nga Federata e Futbollit të Kosovës
(Lajm i përditësuar)
Ministri i Kulturës, Rinisë dhe Sportit, Hajrullah Çeku, ka mirëpritur vendimin e FIFA-së për dënimin e Serbisë pas ofendimeve ndaj Granit Xhakës dhe Xherdan Shaqirit.
Çeku ka thënë se kjo ankesë njejtë si ankesa në dënimin e parë ndaj Serbisë është bërë nga Federata e Futbollit të Kosovës.
“Dënimi i parë para pak javësh për banerin skandaloz me thirrje për gjenocid. Dhe sot, dënimi i dytë për fyerjet e ekipit dhe tifozëve ndaj shqiptarëve. Të dy ankesat zyrtarisht të nisura nga Federata e Futbollit e Kosovës, me mbështetje të gjerë publike e institucionale”, ka shkruar Çeku.
FIFA dënon Serbinë për ofendimin ndaj Xhakës dhe Shaqirit
Federata Ndërkombëtare e Futbollit ka dënuar Serbinë. FIFA të premten e dënoi Federatën serbe me 50 mijë franga për thirrjet fyese të tifozëve në ndeshjen ndaj Zvicrës.
Në ndeshjen e Kupës së Botës në Katar, huliganët serbë kanë fyer vazhdimisht Xherdan Shaqirin e Granit Xhakën, dy lojtarët shqiptarë të Zvicrës. Zvicra kishte fituar 3:2 dhe kishte dërguar Serbinë në shtëpi.
“Komiteti Disiplinor i FIFA-s ka sanksionuar Federatën e Futbollit të Serbisë me gjobë prej 50 mijë franga zvicerane dhe një mbyllje të pjesshme të stadiumit (prej 25 për qind), në ndeshjen zyrtare të radhës të përfaqësueses A. Dënimi është për shkelje të neneve 13 (diskriminimi) dhe 12 (sjellja e pahijshme e lojtarëve dhe zyrtarëve) të Kodit Disiplinor të FIFA”, shkruan në vendim.
FIFA ka sqaruar se bëhet fjalë për thirrjet e tifozëve serbë e po ashtu sjelljen e keqe të ekipit, përkatësisht ndëshkimin e shtatë lojtarëve të Serbisë me kartona të verdhë.
Është ky dënimi i dytë i FIFA-s ndaj Serbisë lidhur me qëndrimet anti-shqiptare në Botërorin në Katar.