Deputetja e PDK-së: Jam kërcënuar me jetë nga një qytetar
Deputetja e PDK-së, Arbnora Salihu, njoftoi se është kërcënuar me jetë nga një qytetar.
“Sot, përmes rrjetit social Facebook jam kërcënuar me jetë dhe jam ofenduar në mënyrën më të rëndë nga një qytetar. Përveç meje është ofenduar dhe linçuar edhe familja ime, përkundër kontributit të saj kombëtar.
Rastin sapo e denoncova në Policinë e Kosovës dhe mbetet në dorën e organeve kompetente që të ndërmarrin të gjitha veprimet e nevojshme ligjore ndaj personit në fjalë.
Përpjekjet e tilla për të më frikësuar, denigruar dhe poshtëruar përmes gjuhës së urrejtjes nuk mund të më ndalin ta kryej me përgjegjësi punën time si deputete e Kuvendit të Republikës së Kosovës.
Përkushtimi dhe angazhimi im për t’i shërbyer vendit dhe qytetarëve është i palëkundur”, shkroi në Facebook deputetja Salihu.
Ajo në një nga seancat e fudit të Kuvendit të Kosovës ka hequr flamurin kombëtar nga foltorja në momentin që fjalën e mori kryeministri Albin Kurti.