Dëshmitari i shtatë intervistohet nga avokati i viktimave

23 Maj, 2023Përditesimi i fundit: 23 Maj, 2023

(Lajm i përditësuar)

Në Gjykatën Speciale po vazhdon të dëgjohet dëshmia e dëshmitarit të shtatë të Zyrës së Prokurorit të Specializuar(ZPS), në rastin kundër ish-krerëve të Ushtrisë Çlirimtare të Kosovës(UÇK).

Gjatë intervistimit nga mbrojtësi i viktimave, Simon Laws, dëshmitari me kodin W-01236 ka folur për periudhën e luftës kur ai pretendon se ishte ndaluar.

Ai ka deklaruar se ende i vuan pasojat e ngjarjeve të luftës, dhe sipas tij, ka marrë edhe trajtim psikologjik për dy vjet në Zvicër.

Video

Laws: Burgosja apo ky ndalimi pati ndonjë efekt psikologjik për ju, çfarë pasojash pati për ty dhe si i përjeton ti në jetën tënde të përditshme, si i kalon këto gjëra?

Dëshmitari: Shumë keq i kam përjetuar, i kam hala mendime të freskëta nuk më hiqen kurrë, më keq, më tmerr nuk ka .

Laws: Për shkak të këtyre vështirësive të është dashur të takosh ndonjë profesionist?

Dëshmitari: Po

Laws: A të kujtohet kur ka ndodhur, kur ke marr ndihmë mjekësore nga një profesionistë për problemet psikologjike?

Dëshmitari: Kam dalë jashtë shtetit, kam mjekime vazhdimisht.

Laws: A ke takuar ndonjë psikolog, të kujtohet kur ka ndodhur?

Dëshmitari: Në Zvicër atje një dy vite kam shkuar vazhdimisht te psikologu por kujtimet nuk më hiqen i kam vazhdimisht.

Dëshmitari i mbrojtur ndër të tjera ka thënë se me 28 dhe 29 janar të vitit 2020 kishte dhënë deklaratë për ZPS-në.

Intervistimi nga prokurori Nathan Quick është bërë në seancë të mbyllur meqë sipas ZPS-së pyetjet lidheshin me një incident të veçantë përmes së cilit mund të identifikohet dëshmitari.

Ndërsa gjatë paradites ka përfunduar dëshmia e dëshmitarit të gjashtë, i cili sikur pesë të tjerë që dëshmuan në këtë çështje, kishte masa mbrojtëse.

Ish-krerët e UÇK-së, për të cilët prokuroria pretendon se kanë kryer krime lufte, po gjykohen pas një procedure paraprake që ka zgjatur më shumë se dy vjet.

Gjatë krejt kësaj kohe, ish-presidenti Thaçi, ish-kryeparlamentarët Krasniqi dhe Veseli, si dhe ish-deputeti Selimi, po qëndrojnë në paraburgim në Hagë, ndërsa në paraqitjet e tyre para gjykatës ata janë deklaruar të pafajshëm.

Dëshmitari i 6-të tregon për tentativat e tij për të kontaktuar Demaçin dhe Krasniqin

Pranë Dhomave të Specializuara në Hagë e ka përfunduar dëshminë e tij dëshmitari i gjashtë i ZPS-së. Ai në dëshminë e tij në kundra-pyetjet e mbrojtjes së Jakup Krasniqit, Aidan Ellis, deklaroi se në vitin 1998 ishte përpjekur të kontaktonte Adem Demaçin dhe Jakup Krasniqin.

Ai tha se këto dy figura kishte dëgjuar se ishin personalitete kryesore në UÇK.

Dëshmitari i gjashtë tha se familja e tij në 1998, ishte përpjekur të kontakonte Demaçin, por kur u pyet për periudhën gjatë këtij viti, dëshmitari tha se nuk i kujtohet.

Avokati: Është e drejtë të themi se familja juaj u përpoq të kontaktonte Adem Demaçin

Dëshmitari: Po

Avokati: Të kujtohet kur ka ndodhur

Dëshmitari:98’tën

Avokati: Pak a shumë të kujtohet kur në 98

Dëshmitari: Jo

Pas kësaj deklarate të dëshmitarit të ZPS-së, mbrojtja e ballafaqoi dëshmitarin me një deklaratë të tij dhënë prokurorisë, ku kishte deklaruar se në vjeshtën e 98’ës, kishin tentuar të takonin Demaçin dhe më pas këtë e pohoi edhe vetë dëshmitari.

I pyetur se kush ishte Adem Demaçi, dëshmitari i gjashtë u shpreh se nga ajo që kishte dëgjuar nga të tjerët por në lajme kishte kuptuar se Demaçi ishte përfaqësuesi politik i UÇK-së.

Avokati: Në 1998 mbase në fillim por jo në fillim të 98 dhe prokuroria të pyet mos nga vjeshta e 98, ti je përgjigjur po mbase rreth asaj periudhe, mbase nga vjeshta kështu të kujtohet ende

Dëshmitari: Ndoshta u kanë vjeshta

Avokati: Prokurori të ka pyetur kush ishte në atë kohë Adem Demaçi dhe ti je përgjigjur në atë kohë ata thonin se ishte kryesori, thonin është edhe mbi UÇK, do të ishte përsëri përgjigja juaj kjo sot

Dëshmitari: Në atë kohë ashtu thoshin, në atë kohë

Avokati: Këtë kishe dëgjuar që e thonin në përgjithësi njerëzit aty në fshat apo jo

Dëshmitari: Po edhe në fshat por edhe mes lajmeve në televizor

Avokati: Të kujtohet të kenë thënë njerëzit që Adem Demaçi ka qenë përfaqësuesi politik i UÇK-së

Dëshmitari: Ashtu thoshin dhe për atë jemi shkuar në ushtri

Ndërsa, kur mbrojtja e Jakup Krasniqi e pyeti se a kishte dëgjuar se Jakup Krasniqi ishte zëdhënës i UÇK-së, dëshmitari me kodin 4355 e pohoi këtë.

Dëshmitari po ashtu u shpreh se në shtator të vitit 1998, kishte shkuar në fshatin e Jakup Krasniqit, saktësisht në Negrovcë.

Avokati: Ti po ashtu i ke thënë prokurorisë që shkove në fshatin e Jakup Krasniqit

Dëshmitari: Nuk dëgjohet

Avokati: Kishe dëgjuar që zotëri Krasniqi ishte zëdhënës i UÇK-së

Dëshmitari: Po

Avokati: Të kujtohet kur ke shkuar në fshatin e tij

Dëshmitari: Po

Avokati: Kur

Dëshmitari: U kanë në shtator 98’tën

Ai tha se vendi ku kishte shkuar për të takuar Jakup Krasniqin me sa i kujtohet quhej Negrovcë, dhe aty kishte shkuar bashkë me nënën e tij, por që me Krasniqin nuk ishte takuar, pasi ai nuk ndodhej në fshat.

Avokati: Shkove tek fshati si the askujt më përpara se do të shkoje

Dëshmitari: Bashkë me nënën, por gjithmonë ishte nëna ajo që kërkonte me shkuar, e unë u deshtë me dërguar

Avokati: Kur shkove atje e mësove se Jakup Krasniqi nuk ishte atje

Dëshmitari: Po

Avokati: Duke qenë se nuk ishte Jakup Krasniqi, atje nuk biseduat ndonjë me Jakup Krasniqin për këtë çështje

Dëshmitari: Nuk kemi biseduar

Pas pyetjeve të mbrojtjes së Jakup Krasniqit, vazhdoi me pyetje gjyqtariGenël Metro, të cilat kryesisht ishin pjesë të redaktuara.

Por, në një pyetje gjyqtari Metro kërkoi të di nëse në qershorin e vitit 1998, kishte ndonjë autoritet apo institucion ku mund të kërkonin të hapej hetim për rastin e “personit 1” dhe “2”, për të cilët dëshmitari i 6-të, tha se janë mbajtur të burgosur nga UÇK-ja.

Dëshmitari në këtë pyetje të gjyqtarit u shpreh se nuk ka pas, por në ato vende ku kanë dëgjuar aty kanë shkuar.

Metro: Këta familjarët çfarë të thanë

Dëshmitari: Mjekësia e Prishtinës janë kanë në spitalin dhe ata e kishin lajmëruar se është gjetur trupi i njëshit

Gjyqtari: Na the se u përpoqe të kontaktoje dy persona brenda UÇK, dhe unë dua të pyes në qershor të 98’ës, a kishte ndonjë vend apo institucion ku të shkoje ti apo numri 2 që të hapej një hetim për t’u zbuluar çfarë u kishte ndodhur personit numër 1 dhe 2

Dëshmitari: Jo ato vende ku i dinim apo ku kemi dëgjuar, aty jemi shkuar

Ndërsa, aktualisht në seancën gjyqësore të sotme kundër katër ish-krerëve të UÇK-së, ka nis dhënien e dëshmisë së tij dëshmitari i shtatë i ZPS-së, i cili fillimisht po iu përgjigjet pyetjeve të ZPS-së, në sesion privat.

Në pjesën më të madhe dhënia e dëshmisë së dëshmitarit të gjashtë të ZPS-së, ka qenë e mbyllur për publikun.

Dëshmitari i gjashtë i ZPS-së, ka nisur dhënien e dëshmisë së tij nga pasditja e djeshme. Një pjesë e dëshmisë së dëshmitarit të gjashtë u dëgjuar kryesisht në seancë të mbyllur për publikun si masë për mbrojtjen e dëshmitarit.

Katër dëshmitarët e parë në gjykimin kundër ish-presidentit, Hashim Thaçi, ish-kryekuvendarëve, Jakup Krasniqi e Kadri Veseli dhe ish-deputetit, Rexhep Selimi, dhanë dëshminë e tyre në seanca të mbyllura për publikun.

Ish-krerët e UÇK-së, për të cilët prokuroria pretendon se kanë kryer krime lufte, po gjykohen pas një procedure paraprake që ka zgjatur më shumë se dy vjet.

Dëshmitari i 6-të: Bënim roje fshati kishin frikë nga forcat serbe

Në seancën e sotme gjyqësore kundër katër ish-krerëve të UÇK-së, dëshmitari i gjashtë i Zyrës së Prokurorit të Specializuar, ka deklaruar se prej frikës nga forcat serbe kishin bërë roje fshati.

Këtë ai e tha pas pyetjeve që mbrojtësi i Rexhep Selimit, Eric Tullyi bëri karshi dëshmitarit të gjashtë.

Mbrojtja e Selimit e ka ballafaquar dëshmitarin e gjashtë të ZPS-së, me disa pjesë të intervistës së tij që e kishte dhënë për Zyrën e Prokurorit të Specializuar, në vitin 2019.

Dëshmitari me kodin 4355, i Zyrës së Prokurorit të Specializuar, ka deklaruar se kryesia e fshatit në një mbledhje, kishte vendosur që të bëhej roje në fshat.

Sipas tij, kjo ka ndodhur në gusht-shtator 1998, dhe këto roje bëheshin për të ruajtur fshatin nga forcat serbe.

Në pyetjen e mbrojtjes së Selimit se për të bërë roje a paguheshin apo ishte punë vullnetare, dëshmitari u shpreh se ishte punë vullnetare pa pagesë.

Ndërsa, në pyetjen e mbrojtjes se a ishte e zakonshme kjo praktikë e rojës së fshatit edhe në fshatrat tjera, kjo përgjigje u redaktua nga Specialja.

Një pjesë e dëshmisë së këtij dëshmitari të radhës së ZPS-së, ka qenë e mbyllur për publikun.

Qysh në nisje të seancës së sotme, prokurori i ZPS-së, i cili po parashtronte pyetje për dëshmitarin e 6-të, Mattheë Holling kërkoi të kalohet në seancë private me qëllim që të mbrohet dëshmitari.

Ndërsa, po në seancën e djeshme gjyqësore kundër Thaçit dhe të tjerëve, dëshminë e tij e përfundoi edhe dëshmitari i pestë i ZPS-së.

Ish-krerët e UÇK-së, për të cilët prokuroria pretendon se kanë kryer krime lufte, po gjykohen pas një procedure paraprake që ka zgjatur më shumë se dy vjet.

Vazhdon gjykimi ndaj Thaçit dhe të tjerëve në Gjykatën Speciale

Në Dhomat e Specializuara në Hagë sot vazhdon gjykimin ndaj krerëve të ish-Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.

Dje ka filluar dëshminë dëshmitari i gjashtë i ZPS-së në gjykimin e Thaçit dhe të tjerëve.

Dje ka përfunduar dëshminë edhe dëshmitari i pestë me kodin 3165 në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

Sikur ditët e kaluara edhe dje seanca në shumicën e kohës ka qenë me përmbajtje të redaktuar dhe në sesion privat.

Seancat në gjykimin e Hashim Thaçit, Kadri Veselit, Rexhep Selimit dhe Jakup Krasniqit për këtë javë janë planifikuar të vazhdojnë deri të mërkurën./21Media

Vjedhja e 200 mijë eurove, nga teqeja tregojnë se për çka do të përdoreshin

Kapet me afër 5 mijë euro të falsifikuara, arrestohet i dyshuari