Do të ndalohet shitja e cigareve për brezat e ardhshëm
Zelanda e Re do të ndalojë shitjen e duhanit për gjeneratën e saj të ardhshme, në një përpjekje për të hequr përfundimisht duhanin.
Të gjithë të lindurit pas vitit 2008 nuk do të jenë në gjendje të blejnë cigare apo produkte duhani gjatë jetës së tyre, sipas një ligji që pritet të miratohet vitin e ardhshëm.
“Ne duam të sigurohemi që të rinjtë të mos fillojnë kurrë të pinë duhan”, tha ministrja e Shëndetësisë Ayesha Verall.
Lëvizja është pjesë e një goditjeje gjithëpërfshirëse kundër duhanpirjes të shpallur nga ministria e shëndetësisë e Zelandës së Re të enjten.
Mjekët dhe ekspertët e tjerë të shëndetit në vend kanë mirëpritur reformat “udhëheqëse në botë” të cilat do të reduktojnë aksesin në duhan dhe do të kufizojnë nivelet e nikotinës në cigare, transmeton rtv21.tv.
“Kjo do t’i ndihmojë njerëzit të heqin dorë ose të kalojnë në produkte më pak të dëmshme dhe do të bëjë shumë më pak të ngjarë që të rinjtë të varen nga nikotina”, tha Profesor Janet Hook nga Universiteti i Otagos.
Zelanda e Re është e vendosur të arrijë një objektiv kombëtar për të reduktuar shkallën e saj kombëtare të duhanpirjes në 5% deri në vitin 2025, me synimin për ta eliminuar përfundimisht.
Aktualisht, rreth 13% e të rriturve në Zelandën e Re pinë duhan, nga 18% rreth një dekadë më parë. Por shkalla është shumë më e lartë – rreth 31% në mesin e popullsisë indigjene Maori, të cilët gjithashtu vuajnë një shkallë më të lartë të sëmundjeve dhe vdekjeve.
Ministria e Shëndetësisë e Zelandës së Re thotë se pirja e duhanit shkakton një në katër kancere dhe mbetet shkaku kryesor i vdekjeve të parandalueshme për popullsinë e saj pesë milionëshe. Industria ka qenë objektivi i ligjvënësve për më shumë se një dekadë tani.
Numri i dyqaneve të autorizuara për të shitur cigare do të reduktohet në mënyrë drastike në nën 500 nga rreth 8,000 tani, thonë zyrtarët.
Vitet e fundit, pirja e cigareve elektronike që prodhojnë një avull që jep gjithashtu nikotinë – është bërë shumë më popullor në mesin e brezave të rinj sesa cigaret.
Megjithatë, autoritetet shëndetësore të Zelandës së Re paralajmërojnë se pirja e cigareve elektronike nuk është i padëmshëm. Studiuesit kanë gjetur agjentë të rrezikshëm që shkaktojnë kancer edhe në lëngjet e cigareve elektronike./21Media