Dy Federata të reja u bënë pjesë e KOK-ut
Asambleja e Punës e Komitetit Olimpik të Kosovës për vitin 2021 u mbajt të mërkurën në mbrëmje, me ç’rast dy federata të reja u bënë anëtare të KOK-ut.
Kryetari i KOK-ut, Ismet Krasniqi e quajti vitin 2021 më të suksesshmin në histori të sportit kosovar. I pari i KOK-ut përmendi suksesin në Lojërat Olimpike Tokio 2020, themelimin e Akademisë Olimpike, aktivitetet e edukimit olimpik, bashkëpunimin me institucionet ndërkombëtare sportive si IOC, EOC, ANOC, ICMG, pastaj Ministrinë për Kulturë, Rini e Sport etj.
I pranishëm në Asamble ishte edhe ministri për Kulturë, Rini e Sport, Hajrullah Çeku, i cili vlerësoi lart bashkëpunimin me KOK-un në zhvillimin e strategjisë kombëtare dhe projekte tjera të shumta.
Siç bëri të ditur KOK përmes Facebook-ut, Çeku përmendi edhe rritjen e buxhetit për KOK-un dhe federatat sportive për vitin 2022, licencimin e federatave etj.
Të pranishëm në Asamble ishin 101 delegatë nga 112 sosh.
“Më pas, asambleistët diskutuan për praninë e disa prej federatave sportive, të cilave iu kontestohej e drejta e votës, derisa u bënë diskutime edhe për kërkesën e mosbesimit të kërkuar nga disa federata sportive, por që Bordi Ekzekutiv i KOK-ut nuk e kishte përfshirë në Rendin e Ditës, duke i vlerësuar arsyetimet të pabaza dhe jostatutare. Kjo ngjalli paknaqësi tek një pjesë e asambleistëve, të cilët lëshuan sallën e Hotelit Emerald, kurse punimet i vazhduan 77 asambleistë. Asambleistët unanimisht aprovuan rendin e ditës, procesverbalin e Asamblesë së Punës 2020 dhe Asamblese Zgjedhore, raportin e punës 2021, raportin financiar 2021, raportin e auditimit 2021, raportin e këshillit mbikëqyrës, planin e veprimit 2022 dhe planin financiar 2022.”, bëri të ditur KOK.
Po ashtu, unanimisht u votua edhe për anëtarësimin e plotë të Federatës së Padelit dhe Federatës Mundje Krahu të Kosovës.
Paraprakisht, u mbajt një minutë heshtje për gjithë kontribuesit e sportit, të cilët u ndanë nga jeta gjatë vitit të kaluar./21Media