Dyshohet se kreu dy vepra penale, IPK arrestoi dhe suspendoi një zyrtar policor

Inspektorati Policor i Kosovës sot ka bërë të ditur se e ka arrestuar një zyrtar policor, pasi që i njëjti dyshohet se e ka kryer veprën penale ”Lëndim i rëndë trupor”, dhe ”Kanosje”.
Informacionet e para hetuesit e IPK-së lidhur me këtë rast i kishin pranuar nga Policia e Kosovës në Pejë se një zyrtar policor (me gradën e rreshterit) jashtë detyrës zyrtare është i përfshirë si i dyshuar në një rast të lëndimit të rëndë trupor.
”Hetuesit e IPK-së kanë dalë në vendin e ngjarjes dhe në koordinim me Prokurorin kujdestar kanë ndërmarrë disa veprime hetimore kurse viktima (zyrtare policore) është dërguar për trajtim mjekësor. Pas këtyre veprimeve hetimore, zyrtarit policor me vendim të prokurorit i është caktuar masa e ndalimit për 48 orë me dyshimin se ka kryer veprën penale ”Lëndim i rëndë trupor” dhe ”kanosje”’, thuhet në njoftimin e IPK-së.
Lidhur me rastin e njëjtë, si pjesë e procedurave administrative dhe hetimore, zyrtari policor është suspenduar.
Hetuesit e IPK-së pritet të ndërmarrin edhe veprime të tjera hetimore drejt ndriçimit të të gjitha rrethanave të këtij rasti./21Media