E diela ditë jopune, Qeveria kërkon mbështetjen e deputetëve

Qeveria e Maqedonisë së Veriut pret që propozim-ndryshimet në Ligjin për Marrëdhëniet e Punës, me të cilat e diela duhet të shpallet ditë jopune, së shpejti t’i kalojnë procedurat parlamentare dhe të votohen në Kuvend.
Zëdhënësi i qeverisë, Muhamed Hoxha sot në një konferencë të rregullt për shtyp në Qeveri u bëri thirrje të gjithë deputetëve, si nga qeveria ashtu edhe nga opozita, që të mbështesin këtë zgjidhje ligjore.
“Propozim i ligjit për ndryshimet në Ligjin për marrëdhëniet e punës, i cili parashikon të dielën të jetë ditë pushimi javor, ende nuk është futur në rend dite në Komisionin kuvendor për Punën dhe Politikën Sociale. Ne presim që kjo zgjidhje ligjore së shpejti të kalojë në komisionin amë në Kuvend dhe më pas, në përputhje me procedurat parlamentare, do t’u paraqitet deputetëve në një seancë plenare. I bëjmë apel të gjithë deputetëve, si nga qeveria ashtu edhe nga opozita, që ta mbështesin këtë zgjidhje ligjore sepse është në interes të qytetarëve”, tha Hoxha, duke iu përgjigjur pyetjeve të gazetarëve.
Propozimi që e diela të jetë ditë jopune duhet të zbatohet nga 1 tetori, shkruan TV21./21Media