“E konsideroj të pakuptimtë”, Vuçiq thotë se nuk do të takohet me Kurtin në Bruksel
Presidenti i Serbisë, Aleksandar Vuçiq, tha më 18 qershor se nuk do të marrë pjesë në takimin me kryeministri e Kosovës, Albin Kurti, që është thirrur nga Brukseli.
“Unë e konsideroj të pakuptimtë të flas me një person që nuk është i gatshëm të flasë”, tha Vuçiq për gazetarët në Beograd.
Përfaqësuesi i lartë i Bashkimit Evropian për politikë të jashtme dhe siguri, ka ftuar Kurtin dhe Vuçiqin në një takim që është thënë se do të mbahet javën e ardhshme.
Kryeministri i Kosovës, Albin Kurti, ka deklaruar se ende nuk ka vendosur nëse do të shkojë në takimin e Brukselit. Ai të shtunën, më 17 qershor, deklaroi për mediat në Prishtinë, se ekipi i tij do t’i përgjigjet ftesës së Borrellit në fillim të javës së ardhshme.
Vuçiqi për tre policët kosovarë të kidnapuar: Asgjë s’u mungon, s’i ka prekur askush
Presidenti i Serbisë, Aleksandar Vuçiq, në një adresim të mbajtur të dielën, ka folur për tre policët e Kosovës që janë kidnapuar të mërkurën brenda territorit të Kosovës.
Vuçiqi ka thënë se atyre “asgjë e keqe s’u ka ndodhur dhe s’i ka prekur askush”.
Ai ka thënë se deklaratat e policëve “janë kontradiktore”.
Ai thotë se njëri prej tyre ka deklaruar se “kishte shkuar të mblidhte kërpudha”.
“Asgjë s’u mungon, nuk kanë asnjë të mavijosur, asnjëri s’i ka prekur. Deklaratat e tyre janë kontradiktore. Njëri thotë nuk kemi ecur, i dyti thotë se kemi ecur pak, e më pas jemi ngjitur edhe pak e jemi larguar nga vetura. Pra, çfarë ishte duke bërë, unë isha duke mbledhur kërpudha”, tha Vuçiq.
Vuçiqi ka thënë se kanë dërguar letër EULEX-it.
Presidenti i Serbisë ka akuzuar duke thënë “se perëndimorët e shqiptarët” janë bashkë dhe se po “gënjejnë”.
“Të vetmit që mund të them se nuk ishin të pasaktë ishte komanda e NATO-s, KFOR dhe ushtarët e KFOR-it”, tha Vuçiq, raporton “B92”.
Vuçiqi ka thënë se Ushtria e Serbisë asnjëherë nuk ka kaluar brenda territorit të Kosovës.
“Nëse e hynë do të informoheni i thashë komandantit të KFOR-it. E nëse hynë në të ardhmen nuk do të kthehet prapa”, tha Vuçiq.