Ekonomia, tregtia e turizmi, disa nga fushat më të rëndësishme në fokus të bashkëpunimit kosovaro-grek

Presidentja Vjosa Osmani -Sadriu, sot u prit në takim nga kryeministri grek, Kyriakos Mitsotakis në kuadër të Samitit të krerëve të shteteve të Evropës Juglindore (SEECP).

Në takim me nikoqirin e Samitit të SEECP-së, kryeministrin Mitsotakis, Presidentja Osmani vlerësoi ngritjen e vazhdueshme të raporteve në mes të Kosovës dhe Greqisë dhe takimet e shtuara në mes liderëve të dy vendeve tona.

“Ekonomia, tregtia e turizmi janë disa nga fushat më të rëndësishme në fokus të bashkëpunimit kosovaro-grek, për të cilat si krerë shtetëror po punojmë bashkërisht që t’i avancojmë, për t’i përafruar edhe më shumë dy popujt tanë dhe bizneset tona”, tha ajo dhe siç informoi Presidenca, Osmani përmendi gatishmërinë e Kosovës që t’i thellojë tutje marrëdhëniet me Greqinë.

“Presidentja Osmani dhe kryeministri Mitsotakis kanë biseduar edhe për luftën ilegale dhe të paprovokuar të Rusisë në Ukrainë, dhe nevojën që demokracitë të qëndrojnë të bashkuara karshi sfidimit të vlerave euro-atlantike. Presidentja Osmani ka nënvizuar nevojën për vëmendje të partnerëve euro-atlantik për rajonin tonë, sidomos ndaj veprimeve që kanë për qëllim të destabilizojnë stabilitetin dhe paqen e fituar me mund në rajonin tonë.”, u bë e ditur në komunikatë.

Presidentja përmendi edhe bashkëpunimin në politikën e jashtme si vendimtare për të ardhmen e kontinentit tonë dhe theksoi se mbështetja për anëtarësimin e Kosovës në Këshillin e Evropës si dhe integrimi euro-atlantik, duhet të shihen edhe nga prizmi i sigurisë, sepse vetëm kështu mund të garantohet avancimi i demokracisë, të drejtave të njeriut, sigurisë dhe paqes në rajon dhe më gjerë./21Media

Back to top button