Elton Ilirjani merr përgjegjësinë: Parashqevi Simaku nuk do mbetet në rrugë

Ka kaluar një vit që kur ikona e muzikës shqiptare, Parashqevi Simaku, tronditi opinionin publik me pamjet e saj të transmetuara në një televizion amerikan.

Në atë intervistë, ajo u prezantua me emrin “Nolfe”, duke rrëfyer realitetin e vështirë të jetës në rrugë dhe betejën e përditshme për mbijetesë – një histori që preku thellë shqiptarët kudo në botë. Viti 2025 shënoi një kthesë të rëndësishme për jetën e artistes.

Parashqevi Simaku u ribashkua me djalin e saj, Luka, ndërsa falë ndihmës së një biznesmeni kosovar, gjeti strehim në Manhattan, duke hedhur hapat e parë drejt një jete më të qëndrueshme.

Megjithatë, pavarësisht këtij zhvillimi pozitiv, pasiguritë për të ardhmen dhe rikthimin në një jetë normale mbetën ende të pranishme. Për të garantuar që ajo të mos përballet më me vështirësi të tilla, ka reaguar miku i saj i afërt, Elton Ilirjani.

Përmes një postimi në Instagram, Ilirjani ka bërë një premtim të fortë dhe publik, duke marrë përsipër mbështetjen e plotë financiare të artistes. “Të kam shumë xhan! Ti nuk do jesh kurrë në rrugë apo në problem.

Sepse zotohem që çdo gjë do financohet nga unë personalisht – qiraja e shtëpisë, jetesa e përditshme dhe çdo nevojë tjetër”, ka shkruar ai.

Ky premtim është pritur me reagime të shumta nga publiku, duke u konsideruar si një akt solidariteti dhe përgjegjësie ndaj një figure që ka lënë gjurmë të pashlyeshme në historinë e muzikës shqiptare.

Rasti i Parashqevi Simakut mbetet një kujtesë e fortë se pas famës dhe suksesit, realitetet njerëzore mund të jenë të brishta, por edhe se mbështetja dhe kujdesi mund të rikthejnë dinjitetin dhe shpresën.