Fëmijët përbëjnë gjysmën e të gjithë refugjatëve ukrainas

Fëmijët përbëjnë gjysmën e 3.8 milionë refugjatëve nga Ukraina që kanë mbërritur në Bashkimin Evropian që nga pushtimi rus, thotë komisionerja e BE-së për Çështjet e Brendshme, Ylva Johansson.
“Numri i të ardhurve është në rënie. Ne kishim 200 mijë ardhje në ditë, tani është ulur në 40 mijë në ditë”, tha Johansson të hënën.
Johansson, e cila po fliste pas një takimi të ministrave të brendshëm të BE-së në Bruksel, shtoi se 800 mijë nga 3.8 milionë të ardhur kanë aplikuar tashmë për mbrojtje të përkohshme në BE, përcjell rtv21.tv
Ajo njoftoi gjithashtu se ministrat e brendshëm të BE-së kishin rënë dakord për një platformë të gjerë të BE-së për regjistrimin e refugjatëve që mbërrijnë dhe aplikojnë për mbrojtje të përkohshme në bllok, me koordinim “në nivel BE” për qendrat e transportit dhe informacionit.
Komisionerja e BE-së vuri në dukje se udhëzimet e përbashkëta për pritjen dhe mbështetjen e fëmijëve, përfshirë të miturit e pashoqëruar, si dhe një plan kundër trafikimit ishin miratuar nga ministrat e BE, raporton CNN
Mungesa e një qasjeje uniforme për menaxhimin e fluksit të refugjatëve gjatë dhe pas krizës së migracionit të vitit 2015 ka qenë një pikë mosmarrëveshjeje në bllok.
Duke paralajmëruar për nevojën e planifikimit të mëtejshëm të emergjencave për refugjatët, ajo tha, “ne duhet të jemi të përgatitur për shumë milionë persona të tjerë që mund të kenë nevojë të ikin nga Ukraina”.
“Ne nuk e dimë se çfarë do të ndodhë nesër”, shtoi komisionerja./21Media

Back to top button