Finlanda vendos brenda javësh për çështjen e aplikimit në NATO

Finlanda pritet të vendosë brenda javësh dhe jo muajsh nëse do të aplikojë për anëtarësim në NATO, tha të mërkurën kryeministrja finlandeze.
Duke folur në Stokholm pas një takimi dypalësh me kryeministren suedeze Magdalena Andersson, kryeministrja e Finlandës, Sanna Marin ka thënë se do të ishte më mirë të koordinohej me Suedinë për të marrë vendime të ngjashme sigurie.
“Ne duhet të kemi një pikëpamje për të ardhmen dhe ne po e përdorim këtë kohë për të analizuar dhe gjithashtu për të ndërtuar pikëpamje të përbashkëta për të ardhmen kur bëhet fjalë për sigurinë. Nuk do të jap asnjë lloj orari se kur do të marrim vendimet tona, por mendoj se do të ndodhë mjaft shpejt. Brenda javësh, jo brenda muajve”, ka thënë Marin.
Parlamenti finlandez mori të mërkurën një letër të bardhë mbi ndryshimet në mjedisin e sigurisë së vendit pas sulmit të fqinjit të saj Rusisë ndaj Ukrainës. Raporti pritet të nënshkruhet nga ligjvënësit dhe të bëhet publik gjatë ditës së sotme.
Andersson nuk shkoi aq larg sa Marin, duke thënë se Suedia ishte ende duke peshuar vendimin dhe duke vënë në dukje se atje ka zgjedhje në shtator.
Kur presidenti rus Vladimir Putin filloi pushtimin e tij në Ukrainë, qëllimet e tij ishin të qarta. Ai donte të sillte fqinjin e tij në këmbë, të pohonte autoritetin rus në Evropën Lindore dhe ta bënte Perëndimin të mendonte dy herë për zgjerimin ushtarak dhe politik drejt kufijve të Rusisë.
Por në një aspekt të rëndësishëm, plani i Putinit duket se ka dështuar: Lufta ka bashkuar Perëndimin kundër Moskës në mënyra që dukeshin të paimagjinueshme në janar.
Tani, Finlanda dhe Suedia, kombe që janë zyrtarisht të paangazhuar,  po afrohen gjithnjë e më shumë drejt anëtarësimit në NATO, aleancën ushtarake të udhëhequr nga SHBA./21Media