Fleckenstein: SHBA e shqetësuar për Shqipërinë

Fleckenstein ka thënë se e mbështetë deklaratën e Johanes Hahn për Shqipërinë

Eurodeputeti dhe raportuesi për Shqipërinë, Knut Fleckenstein, deklaroi sot se mbështetë mesazhin e komisionerit për Politikë Evropiane të Fqinjësisë dhe Negociatave për Zgjerim, Johannes Hahn, drejtuar shqiptarëve një ditë më parë.

Knut Fleckenstein nëpërmjet një postimi në rrjetin social Facebook dhe Twiter shprehet se “Mbështetni këtë mesazh për njerëzit #Albania. Gjithashtu, pas bisedimeve në SHBA, të gjithë janë të trishtuar për situatën. Përgjegjësia është gjithashtu e qartë”.

Komisioneri për Politikë Evropiane të Fqinjësisë dhe Negociatave për Zgjerim, Johannes Hahn, një ditë më parë duke iu drejtuar shqiptarëve ka thënë se: “gjatë disa javëve të fundit, janë bërë disa përpjekje për të nxitur dialogun midis partive politike në Shqipëri, nga përfaqësues të BE-së, përfshirë veten dhe partnerët e tjerë ndërkombëtarë. Ne kemi dëgjuar me kujdes shqetësimet dhe pritjet nga të gjitha anët, duke u përpjekur për të lehtësuar një zgjidhje të krizës në vazhdim. U ofruan një numër opsionesh, me shpresë që partitë dhe udhëheqësit të jetojnë në përgjegjësinë e tyre për të gjetur një zgjidhje të përbashkët. Për fat të keq, ky nuk ishte rasti”.

“Pra, sot jemi në një situatë ku është vënë në lëvizje procesi zgjedhor për zgjedhjet e përgjithshme më 18 qershor. Zgjedhjet do të zhvillohen pa pjesëmarrjen e partive kryesore të opozitës”, ka thënë ndër të tjera komisioneri Hahn.