Gërvalla: Si Putini sot në Ukrainë, në vitin 1999 ka bërë edhe Serbia në Kosovë

Zëvendëskryeministrja dhe ministrja e Punëve të Jashtme dhe Diasporës, Donika Gërvalla duke folu në panelin “Media and Freedom” të Samitit të Demokracisë,ka përmendur vrasjen e babait të saj, Jusuf Gërvalla, nga shërbimi sekret jugosllav, i dominuar nga Serbia në Gjermani. Një ish-agjent, sipas saj, përgjegjës për planifikimin e atyre vrasjeve, krenohej për vrasjen e babait të saj dhe vrasjeve të tilla.

“Ky është realiteti në Serbi, Evropë, në vitet 2022 dhe 2023 dhe është e rëndësishme ta njohim këtë realitet. E përmend këtë për të treguar se nuk është çështja tek fjalët e bukura apo tek qëllimet, por kërcënimi për lirinë, demokracinë dhe mediat e lira është real”, është shprehur ajo.

Ajo ka shtuar se njëjtë si Putini sot në Ukrainë, në vitin 1999 ka bërë edhe Serbia kundër Kosovës, duke u përpjekur që popullatën shqiptare ta debojë nga vendi.

“Ministri serb i informacionit – pra i lajmeve të rreme dhe gënjeshtrave – gjatë periudhës së gjenocidit ishte Vuçiçi. Sot, Kosova është një vend i pavarur dhe ne jemi duke strehuar gazetarë ukrainas”.

“Iu ndihmuam të krijojnë një qendër të fuqishme të gazetarisë dhe në të njëjtën kohë një qendër të fuqishme për të luftuar lajmet e rreme që lidhen me Ukrainën dhe Rusinë. Pasi që kjo iniciativë u tregua e suksesshme, tani jemi duke strehuar edhe gazetarë afganë”, tha Gërvalla.