Gjilani fiton 2.6 milionë euro
Gashi dhe Haziri me marrëveshje milionëshe
Ministria e Kulturës, Rinisë dhe Sportit ka investuar në Gjilan dhe në Zhegër 2.6 milionë euro për ngritjen dhe avancimin e infrastrukturës sportive, rinore dhe kulturore.
Ministri në detyrë, Kujtim Gashi dhe kryetari i Komunës së Gjilanit sot kanë nënshkruar marrëveshjen milionëshe.
“Me kryetarin e Komunës së Gjilanit Lutfi Haziri nënshkrova marrëveshje bashkëpunimi për finalizimin e projekteve: Renovimi i Stadiumit të Qytetit në vlerë prej 1 milion e 950 mijë euro, dhe projekti për palestrën sportive në Zhegër të Gjilanit në vlerë rreth 650 mijë euro”, ka shkruar Gashi në llogarinë e tij “Facebook”.
Kujtim Gashi shtoi se MKRS-ja është e fokusuar në përmirësimin dhe avancimin e infrastrukturës sportive në Republikën e Kosovës.
Ministri i Kulturës, Rinisë dhe Sportit, Kujtim Gashi edhe dje në Shtime, ka nënshkruar dy memorandume për financimin e projekteve sportive, rinore e kulturore. Bëhet fjalë për projektet: Ndërtimin e Arkivit të qytetit dhe dhe Përfundimin e punimeve në Stadiumin e Qytetit me 474 mijë euro./21Media