Gjilani në shënim të ditëve të çlirimit organizoi vrapimin ”Shtegu i Lirisë”

2 min read

 

Komuna e Gjilanit në bashkëpunim me Shoqatën e Pedagogëve të Sportit Shkollor, sot organizuan vrapimin ”Shtegu I Lirisë”, në shënim të çlirimit të Gjilanit dhe Kosovës.

Ky organizim u bë me qëllim të nderimit dhe respektit për dëshmorët, martirët, invalidët dhe veteranët e luftës për liri, ku garues ishin nxënësit e shkollave të mesme.

Drejtoresha për Kulturë, Rini dhe Sport, Deniza Limani tha se drejtoria këtë vit ka në agjendën e saj një numër të madh të aktiviteteve, për çka i falënderoi të gjithë pjesëmarrësit jo vetëm në këtë garë, por në të gjitha aktivitetet tjera të deritanishme.

”Dita e Çlirimit të Gjilanit dhe Kosovës është gëzim i të gjithëve bashkarisht, sepse deri në vitin ’99 shqiptarët e Kosovës ishin të shtypur e të mbyllur, kurse tani është një gjendje krejt ndryshe. Ideali për liri atëherë, është arritur dhe realizuar tashmë falë dëshmorëve, martirëve, të rënëve dhe veteranëve të luftës. Ideali sot duhet që secilin prej nesh ta gjej në punë të mira për zhvillimin, ndërtimin dhe arsimimin në të gjitha fushat, për të qenë meritueshëm përkrah shteteve të zhvilluara”, tha ajo.

Sipas njoftimit të komunës, në kategorinë e meshkujve vendin e parë e zuri, Art Berisha nga gjimnazi ”Xhavit Ahmeti”, në vendin e dytë Bleon Abazi nga gjimnazi ”Zenel Hajdini” dhe vendi i tretë Genc Zylfiu, gjimnazi ”Xhavit Ahmeti”.

Në kategorinë e femrave, vendin e parë e zuri Tringa Nevzadi, gjimnazi ”Zenel Hajdini”, vendin e dytë Anitë Selmani, gjimnazi ”Xhavit Ahmeti” dhe vendin e tretë, Viola Syla.