Gjuajti me kallashnikov në mes të autostradës, identifikohet dhe shpallet në kërkim dasmori 21 vjeçar

Policia e Kurbinit ka identifikuar 21-vjeçarin që ka qëlluar me kallashnikov në ajër nga automjeti në ecje, gjatë një ceremonie dasme, duke rrezikuar jetën e qytetarëve dhe më pas e postoi videon në rrjetet sociale.
Bëhet fjalë për shtetasin Klajdi Tafaj, i cili ka qëlluar me armë zjarri nga automjeti, në ceremoninë e dasmës së kushëririt të tij, shtetasit M. T, më datën 15.08.2021 dhe pas disa ditësh e ka postuar videon në rrjetet sociale.
Raportohet se policia ka sekuestruar armën e zjarrit kallashnikov me krehër me fishekë, me të cilën dyshohet të jetë qëlluar.

Gjithashtu, është proceduar penalisht shtetasi M.T., 30 vjeç, banues në Fushë Gjormë, Kurbin, kushëriri i autorit të dyshuar, për veprën penale “Moskallëzimi i krimit”.
Materialet hetimore janë referuar në Prokurorinë e Rrethit Gjyqësor Kurbin, për veprime të mëtejshme, për veprat penale “Mbajtja pa leje e armëve të zjarrit dhe municionit luftarak”, “Prishja e rendit dhe qetësisë publike” dhe “Moskallëzimi i krimit”./oranews