Greqia planifikon vendosjen e barrierës në det për emigrantët

Kriza e emigrantëve

Greqia po planifikon të vendosë një barrierë lundruese në detin Egje, për të parandaluar mbërritjen e emigrantëve dhe refugjatëve nga Turqia.

Ministri i Mbrojtjes i Greqisë, Nikos Panagiotopoulos, ka njoftuar se vendi i tij planifikon të vendosë një barrierë lundruese në detin Egje, me qëllim të parandalimit të mbërritjes në këtë vend të emigrantëve dhe refugjatëve nga Turqia.

Gjatë viteve të fundit Greqia ka shërbyer si një portë hyrëse për në Bashkimin Evropian, për më shumë se një milionë refugjatë sirianë dhe migrantë të tjerë.

Derisa një marrëveshje me Turqinë ka ulur ndjeshëm numrin e refugjatëve, që nga viti 2016, ishujt grekë ende po përballen me kampe të mbipopulluara.

Autoritetet greke po planifikojnë që ta blejnë pengesën me gjatësi 2.7 kilometra e cila do të vendoset në det, jashtë ishullit të Lesbos, ku gjendet kampi i mbipopulluar Moria.

Qeveria tashmë ka përgatitur dokumentin, përmes të cilit fton kompanitë ofertuese të bëjnë propozimet për shitjen e pengesës.

“Ftesa për barrierën lundruese është në drejtimin e duhur. Ne do të shohim se cili është rezultati, dhe efekti i saj si parandaluese në praktikë”, tha ministri i Mbrojtjes, Nikos Panagiotopoulos.

Vitin e kaluar, 59 mijë e 726 migrantë dhe refugjatë arritën në brigjet e Greqisë, sipas Agjencisë për Refugjatë të Kombeve të Bashkuara./21Media

Back to top button