Haradinaj: Fituesi i zgjedhjeve po e vonon krijimin e institucioenve

Haradinaj: Ne jemi parti opozitare

Kryeministri në detyrë Ramush Haradinaj, ka deklaruar se Lëvizja Vetëvendosje është duke e vonuar krijimin e institucioneve, për çka shtoi se nuk e kupton pse fituesi nuk e krijon qeverinë.
Ai ka thënë se është mirë që institucionet të krijohen sa më shpejt, pasi sipas tij, vazhdimisht është menduar se po ndodhin shpenzime jo të arsyeshme, emërime jo të duhura dhe probleme të tjera.

E për këto, Haradinaj ka shtuar se fituesi i zgjedhjeve nuk po lodhet.

Haradinaj derisa ka folur për mbajtjen e takimit të liderëve të Ballkanit Perëndimor në Tiranë për mini-shengenin, ka thënë se nuk duhet të mërziten kush ku shkon, por duhet të mërziten pse nuk po i kryejnë punët e tyre.

“Tani fituesi i zgjedhjeve hetohet që nuk lodhet për këto, pra e vonon krijimin e institucioneve. Nuk e kuptoj mandatarin ose fituesin pse nuk e krijon qeverinë. Këtu është problemi, nuk duhet me u mërzite kush ku shkon, sa duhet me u mërzite pse nuk po i kryejmë ne punët tona. Unë nuk jam mërzitur çka ka bë Mogherini se e kemi kryer në atë kohë punën tonë, pra ia kemi heq dialogun e kemi qit te Merkeli, nuk jam mërzitur çka ka thënë Vuçiqi ose disa udhëheqës të tjerë ose ambasadat këtu, po e kemi krijuar ushtrinë, kemi kryer Trepçën, pavarësimin energjetik, kemi taksën. Pra, i kemi kryer punët e Kosovës dhe për këtë arsye ne nuk dëmtohemi sot nga kjo që ka ndodhur në Tiranë ose diku tjetër, se jemi vetvetja, pra qëndrojmë vet, jemi shtet”, ka thënë ai.

I pyetur se nëse Lëvizja Vetëvendosje dështon të krijojë koalicionin qeverisës me LDK-në, a do të pranonte një ftesë për të qenë pjesë e qeverisë, Haradinaj ka thënë se janë parti opozitare.

“Ne jemi parti opozitare, nuk kemi kauzë pjesëmarrjen në një qeverisje të z.Kurti, një qeverisje të lajmëruar prej tyre, e respektojmë vendimin e sovranit, kush ka fituar, presim prej atyre t’i marrin përgjegjësitë. Pra, mos ta vonojnë formimin e qeverisë. Nuk bie përgjegjësia e njëjtë mbi të dytin, mbi të tretin, pas zgjedhjeve, zakonisht në sistemin tonë parlamentar i pari e mbanë përgjegjësinë. Ai që i ka fituar zgjedhjet ai është përgjegjës me krijua institucionet”, është shprehur ai.

Kujtojmë se gjatë ditës së djeshme përsëri janë takuar lideri i Lëvizjes Vetëvendosje, Albin Kurti dhe ai i LDK-së, Isa Mustafa por sërish nuk kanë arritur ndonjë marrëveshje.