Haradinaj pranon telegram urimi nga Theresa May
May i uron Haradinajt festat e fundvitit
Kryeministri i Kosovës, Ramush Haradinaj këtë mëngjes ka pranuar një telegram urimi për festat e fundvitit nga kryeministrja britanike, Theresa May. Këtë e ka bërë të ditur vetë kryeministri përmes një postimi në Facebook, ku ka theksuar se tani më shumë se kurrë ekziston vullneti i ndërsjellë për fuqizimin e miqësisë dhe intensifikimin e partneritetit ndërmjet Kosovës dhe Britanisë.
“Mëngjesin e sotëm, pata kënaqësinë të pranoj urim për festat e fundvitit nga Kryeministrja Britanike, Theresa May. Tani kur po hyjmë në dekadën e dytë të marrëdhënieve të shkëlqyera bilaterale me Britaninë e Madhe, më shumë se kurrë ekziston vullneti i ndërsjellë për fuqizimin e miqësisë dhe intensifikimin e partneritetit ndërmjet popujve dhe shteteve tona. Poashtu, falënderoj homologun tim hungarez Viktor Orban, anëtaren e Komisionit Europian Violeta Bulc dhe ambasadorin japonez në Austri Kiyoshi Koinuma, për urimet e përzemërta.”, ka shkruar Haradinaj.