Haxhiu për Deharin: Provat ekzistojnë, gjithçka që duhet është vullneti i policisë dhe prokurorisë
(Lajm i përditësuar)
Ministrja e Drejtësisë, Albulena Haxhiu, ka thënë se “krimi ndaj Astrit Deharit, përfshinë një sërë veprimesh për të cilat ende askush nuk dha përgjegjësi”.
Në 7 vjetorin e vdekjes së Astrit Deharit, Haxhiu ka thënë se janë zhvilluar hetime të ndryshme por edhe përpjekje për ta fshehur rastin.
“I paraburgosur, pa aktakuzë, pa gjykim, pa dënim, për 68 ditë në burg, Astrit Dehari nuk u mor asnjëherë në pyetje. Në burgun e Prizrenit, më 5 nëntor, Astrit Dehari u vra në rrethana të sqaruara nga ekspertë të mjekësisë ligjore dhe Raporti i Institutit Zviceran nga Lozana, por të pa sqaruara nga aturoitetet e drejtësisë. Siҫ dihet, një sërë anomalish institucionale vërehen menjëherë pas gjetjes së trupit të Astrit Deharit, që nga vonesa e ndihmës mjekësore, tek nxitimi i deklarimeve të Kryepolicit të rajonit të Prizrenit, Nexhmi Krasniqi, e po ashtu Kryeprokurorit i Prokurorisë Themelore në Prizren, Sylë Hoxha. Njëri konstatonte se Astriti vdiq nga mbi doza e medikamenteve, kurse tjetri e cilësoi si vetëvrasje ende pa nisur asnjë hetim. Hetime të ndryshme janë zhvilluar, sikurse edhe përpjekjet për ta fshehur këtë krim. Provat ekzistojnë dhe gjithçka që duhet është vullneti i policisë dhe prokurorisë për ta zbardhur deri në fund këtë rast”, ka shkruar ajo në “Facebook”.
Ajo ka thënë se Ministria e Drejtësisë ka bërë gjithçka brenda kompetencave të veta, derisa ka shtuar se i mbetet institucioneve të drejtësisë të veprojnë dhe te sjellin rezultatet e këtij rasti.
“Ministria e Drejtësisë ka bërë gjithçka që lejojnë kompetencat e saj. I mbetet institucioneve të drejtësisë të veprojnë dhe të sjellin rezultate ndaj këtij krimi ende të errësuar”, ka thënë Haxhiu.
Ajo ka thënë se drejtësia për Astritin duhet të ndodhë.
“Ajo nuk mund të vonohet më gjatë”./21Media
Shtatë vjet nga vdekja e Astrit Deharit
Janë bërë shtatë vjet nga vdekja e Astrit Dehari.
Aktivisti i Lëvizjes Vetëvendosje, vdiq më 5 nëntor 2016 në Burgun e Prizrenit, në rrethana ende të paqarta.
Në nderim të tij, Vetëvendosje ka organizuar sot disa aktivitete.
Në orën 9:30, do të bëhen homazhe tek varri i tij, në Zllatar.
Në ora 12:00, Organizata “Studim, Kritikë, Veprim” mban një diskutim.
Ky aktivitet organizohet te Parku “Astrit Dehari” te Biblioteka e Fakultetit të Mjekësisë.
Nga ora 14:00, kjo parti organizon aktivitetin e dhurimit vullnetar të gjakut.
Ndërkaq, nga ora 18:00 do të bëhet ndezja e qirinjvem tek murali për Astrit Deharin në Kino Abc.