Hazardi vendos të pensionohet nga futbolli në moshën 32-vjeçare

Eden Hazard ka vendosur të pensionohet në moshën 32-vjeçare, pasi i është prishur kontrata e tij me Real Madridin, nga e cila përfitonte 460,000 euro në javë.

Legjenda e Chelseat do të largohet nga gjiganti spanjoll në fund të këtij muaji pasi kontrata e tij u ndërpre një vit më herët, sipas raportit nga Mundo Deportivo, përcjell rtv21.tv.

Hazard ka kaluar katër vite të vështira në Santiago Bernabeu pasi nënshkroi nga Chelsea për 116 milionë euro më 2019. Ky transferim mbetet ende nënshkrimi rekord i klubit, por Hazard nuk ka arritur t’i shpërblejë shpenzimet e klubit madrilienë.

Megjithatë, ai është rehatuar në Madrid dhe tani flet rrjedhshëm spanjisht, andaj planifikon të qëndrojë në kryeqytetin spanjoll me familjen e tij. Kjo e ka shtyrë atë të mendojë të pensionohet në moshën 32 vjeçare në mënyrë që të mbetet aty ku është vendosur.

Hazard, i cili u tërhoq nga detyra ndërkombëtare pas largimit të Belgjikës nga Kupa e Botës 2022, mund të bashkohet ende me një klub tjetër afër qytetit.

Megjithatë, ky opsion mbetet jashtë dorës së tij, me vetëm një klub që thuhet se i është afruar anësorit belg pas përfundimit të kontratës së tij. Skuadra e MLS, Vancouver Whitecaps thuhet se ka vendosur një marrëveshje në tryezë për Hazard, por kjo do të prishte planet e tij për të qëndruar në kryeqytetin spanjoll.

Duke qenë një favorit i tifozëve gjatë shtatë viteve me Chelsea, forma e Hazard nuk arriti kurrë të njëjtat nivele në Spanjë.

Lëndimet bënë që ai të ketë kohë të kufizuar në 76 paraqitje, në të cilat ai shënoi vetëm shtatë gola dhe bëri 12 asistime. Sezonin e kaluar ai shënoi një herë në 10 ndeshje dhe nuk arriti të luajë plot 90 minuta.

Me lëndimet që i bënë atij të humbasë 78 ndeshje për Real Madridin, Hazard nuk ka plotësuar plot 90 minuta për klubin që nga nëntori i vitit 2021. /21Media