Hill thotë se Serbia duhet të mendojë se ku është e ardhmja e saj

Ambasadori amerikan në Beograd, Christopher Hill deklaroi se Serbia duhet të mendojë se ku është e ardhmja e saj.
Hill tha se Serbia duhet të shqyrtojë nëse “ky qëndrim neutral” i Beogradit zyrtar është i qëndrueshëm.
Hill u tha gazetarëve në Beograd se ajo që ndodhi në Ukrainë “është një sulm brutal ndaj atij vendi dhe vazhdimi i vrasjes së civilëve, diçka që është krejtësisht e papranueshme në këtë shekull”.
Ai shtoi se një zhvillim i tillë nuk është parë që nga përfundimi i Luftës së Dytë Botërore, transmeton rtv21.tv.
“Ne të gjithë jemi të vetëdijshëm se bota ka ndryshuar që nga shkurti dhe se të gjithë duhet të rimendojmë se ku jemi, cili është pozicioni ynë dhe ku duam të jemi në të ardhmen”, tha ai.
I pyetur se cili duhet të jetë prioriteti për Serbinë në këtë moment – vendosja e sanksioneve kundër Rusisë apo normalizimi i marrëdhënieve me Kosovën, Hill u përgjigj se këto janë çështje për autoritetet serbe.
“Unë mendoj se kjo është pyetja që duhet t’ua bëni përfaqësuesve të qeverisë suaj, unë përfaqësoj qeverinë amerikane këtu dhe nuk jam këtu për të dhënë këshilla, kështu që ju duhet të gjeni përgjigje për ato pyetje me autoritetet serbe” tha Hill./21Media