Hotin e pret një seancë ‘e nxehtë’ për marrëveshjen e arritur në Washington
Kryeministri i Kosovës, Avdullah Hoti do të raportojë të enjten para deputetëve për marrëveshjen e arritur në Washington. Kështu ka vendosur Kryesia e Kuvendit në mbledhjen e sotme. Në seancën e parë të sesionit vjeshtor pritet të shqyrtohen edhe disa pika tjera të papërfunduara nga seancat e kaluara.
Marrëveshja është nënshkruar më 4 shtator në Shtëpinë e Bardhë nga kryeministri i Kosovës Avdullah Hoti dhe presidenti i Serbisë Aleksandar Vuçiq, ndërsa i pranishëm ishte edhe presidenti amerikan Donald Trump.
Marrëveshja është kundërshtuar nga partitë opozitare, Lëvizja Vetëvendosje dhe Partia Demokratike e Kosovës, të cilat kanë akuzuar Hotin se nuk ka sjellë nga Uashingtoni njohjen e premtuar, përderisa me marrëveshjen e nënshkruar ka dëmtuar Kosovën.
Vetëvendosja e ka kritikuar marrëveshjen për normalizim ekonomik midis Kosovës dhe Serbisë, duke thënë se disa nga pikat e saj janë gabim dhe shkelin Kushtetutën.
Zyrtarë të kësaj partie janë ndalur kryesisht në pikën 7 të marrëveshjes, ku Kosova dhe Serbia pajtohen të punojnë me Departamentin amerikan të Energjisë, me qëllim të përdorimit të përbashkët të liqenit të Ujmanit, i cili është furnizues jetik i ujit dhe energjisë në Kosovë.
Vetëvendosje ka akuzuar Hotin se ka pezulluar përpjekjet për anëtarësim në organizata ndërkombëtare, duke bërë kështu një lëshim të madh dhe që paraqet shkelje të Kushtetutës.
Në një pikë të marrëveshjes, Kosova po ashtu dakordohet t’i bashkohet mini-Shengenit, një nismë kjo për bashkëpunim ekonomik rajonal që është shpallur nga Serbia, Shqipëria dhe Maqedonia Veriore vitin e kaluar, e kundër së cilës ishte deklaruar edhe vetë kryeministri Hoti.
Vetëvendosje po ashtu ka paralajmëruar hapa për mocion për rrëzimin e Qeverisë së Kosovës.