IKSHPK-ja rekomandon edhe më tutje të vlohet uji para përdorimit
Instituti Kombëtar i Shëndetit Publik ka bërë të ditur se uji në rrjetet shpërndarëse nga sisteme me vlera të shtuara të turbullirës nuk është brenda standardit të paraparë dhe nuk rekomandohet të pihet.
IKSHPK rekomandon që konsumatorët që shfrytëzojnë këto rrjete shpërndarëse të ujit nga sisteme me vlera të shtuara të turbullirës para përdorimit ta vlojnë si masë e sigurisë bakteriologjike e zbatueshme në situata me turbullirë të shtuar në resurse.
Njoftimi i IKSHPK për të gjitha kompanitë rajonale të ujësjellësit:
Situata aktuale me ujë të pijes në vendbanimet e vërshuara
Ekipet e Institutit Kombëtar kanë ngritur vigjilencën dhe monitorimin e ujit për pije. Janë regjistruar vlera të shtuara të turbullirës në disa burime dhe si pasojë ka vështirësi në trajtim të ujit në zonat:
KRU “Prishtina”- Rajoni Prishtinë: fabrika në Shkabaj dhe fabrika në Drenas
Turbullira e shtuar në Kanalin Ibër Lepenc e ka vështirësi procesin e trajtimit te ujit në FPU Shkabaj dhe në FPU Drenas. Këto dy fabrika janë jashtë funksionit për shkak të pamundësisë të proceseve teknologjike të përpunimit te ujit. Për shkak të uljes së kapacitetit prodhues janë duke u zbatuar restrikcione në tërë zonat e shërbimit të KRU-Prishtina.
Të gjitha mostrat e testuara në laboratorët e IKSHPK janë brenda standardeve për ujë të pijshëm sipas Udhëzimit Administrativ Nr.10/21 për cilësi dhe konsum human.
KRU “Mitrovica”- Rajoni Mitrovicë: fabrika në Shipolit- Mitrovicë dhe fabrika në Balice- Vushtrrisë
Nga dje datë 19.01.2023 FPU Balicë/Vushtri dhe FPU ne Shipol/Mitrovicë ka ndërpre furnizimin në Mitrovicë dhe Skenderajt për shkak të rritjes së turbullirës në ujin e papërpunuar.
Pritet në orët e pasdites të startojë trajtimi me kapacitet të zvogëluar.
Në mostrat e grumbulluara deri dje, analiza laboratorike fiziko-kimike rezultojnë me vlerë të ngritur të turbullirës e cila i tejkalon vlerat standarde të lejuara. Nga rezultatet preliminare tē mostrave bakteriologjike të ditës së djeshme, janë në rimbjellje dhe rezultatet përfundimtare që do të përfundojnë nesër.
KRU “Hidrodrini”- Rajoni i Pejës: burimin Drini I Bardhe –Radavc dhe burimi Shkozë-Junik
Turbullira vazhdon me qenë prezentë në burimet burimi Drini i Bardhë-Radavc dhe burimi Shkozë-Junik.
Ndërsa për shkak të vërshimeve dhe prurjeve në burime, është ndërprere furnizimi me ujë nga burimi Jarinë-Klinë dhe tani furnizimi bëhet vetëm nga fabrika e ujit në Klinë. Gjithashtu është ndërprerë furnizimi me ujë nga burimi i ujit drenazhet sistemi CDF-Deçan.
Të gjitha mostrat e testuara në laboratorët e QRSHP-Pejë janë brenda standardeve për ujë të pijshëm sipas Udhëzimit Administrativ Nr.10/21 për cilësi dhe konsum human.
KRU “Gjakovë”- Rajoni i Gjakovës: burimi në Demjan dhe Gërqinë
Në zonat e furnizimit nga KRU”Gjakova” gjendja e cilësisë së ujit të pijes është e qetë, të gjitha mostrat e analizuara janë brenda standardeve të parapara për ujin e pijshëm.
Në zonat e furnizimit nga burimet në Demjan dhe Gërqine uji nuk është për pije për shkak të vlerave të shtuara të turbullirës
KRU “Bifurkacioni”- Rajoni Ferizaj: fabrika në Pleshinë dhe sistemi në Kaçanik
Të gjitha mostrat e ujit të cilat janë marrë dje dhe sot në Ferizaj dhe Kaçanik janë brenda standardeve për ujin e pijes.
Ekipet tona në teren vazhdojnë me monitorim të rregullt.
Uji në Prishtinë e disa komuna aktualisht nuk është për pije
Në një njoftim nga Kompania Rajonale e Ujësjellësit (KRU) “Prishtina” thuhet se si pasojë e reshjeve të shiut, uji është turbulluar.
Si shkak i reshjeve të dendura atmosferike në afërsi dhe rreth liqenit të Ujmanit kemi ngritje të turbullirës së ujit në kanalin e Ibër Lepencit, thuhet në njoftim.
“Për shkak të gjendjes alarmante me vërshime dhe turbullirë të ujit në kanalin e Ibër Lepencit, përveç Fushë Kosovës, Drenasit, Zonës Industriale dhe lagjes Kalabria në Prishtinë, çrregullime në sistemin e furnizimit me ujë sot do të kenë edhe: lagjja “ Kodra e Trimave” dhe të gjitha zonat që furnizohen me ujë nga rezervuari i Mirëditës si : lagjja e Muhaxhirëve, lagjja Dodona, Taslixhe, Aktash, Bregu i Diellit dhe të gjitha zonat e Matit”, thuhet në njoftimin e KRU “Prishtina”.
Paralajmërohet se kjo situatë vazhdon deri në përmirësimin e situatës me turbullirë në kanal./21Media