Interesimi për vaksinim në gjimnazin “Xhevdet Doda” në Prishtinë

 
Organizuar nga Ministria e Shëndetësisë, ka nisur sot vaksinimi përmes ekipeve mobile në gjimnazin “Xhevdet Doda” të Prishtinës, ku të pranishëm ishin edhe Zëvendësministrja e Shëndetësisë dr. Dafina Gexha -Bunjaku dhe Sekretari i Përgjithshëm i MSh-së, Dr. Naim Bardiqi.
Me këtë rast, Zëvendësministrja Gexha-Bunjaku dhe Sekretari Bardiqi, në cilësinë edhe të prindërve, përcollën nga afër edhe vaksinimin e fëmijëve të tyre, duke u vaksinuar krahas nxënësve të tjerë të kësaj shkolle.
“Vaksinim ishte shumë i madh dhe ata vaksinoheshin nga ekipi mobil, pasi paraprakisht kishte marrë deklaratat e pajtueshmërisë së prindërve të tyre për vaksinim, të cilët i prezantonin me rastin e vaksinimit”, bëhet e ditur në njoftimin e Ministrisë së Shëndetësisë.
Zëvendësministrja Gexha-Bunjaku dhe Sekretari Bardiqi thanë se përmes shembullit personal duan t’i sigurojnë dhe inkurajojnë prindërit për vaksinimin e fëmijëve të tyre si rrugën më të mirë për t’i mbrojtur ata dhe për të siguruar mbajtjen e shkollave hapur.
“Shkolla është vendi ku çdo i ri takohet me dijen dhe me shkencën. Një nga zbulimet më të rëndësishme shkencore në dy shekujt e fundit, ka qenë vaksina. Pa vaksina, shumë sëmundje nuk do të kaloheshin kaq lehtë sot. Edhe gripi dikur ka qenë një pandemi vdekjeprurëse në gjithë botën, të cilën njerëzimi e mposhti vetëm përmes vaksinave, dhe sot gripi konsiderohet ndër sëmundjet e lehta e të zakonshme”, tha Ministrja Gexha-Bunjaku.
Ajo theksoi se Qeveria e Kosovës, Ministria e Shëndetësisë i siguron qytetarëve të Republikës vaksinat më cilësore në tregun botëror, pa pagesë. “Tashmë këto vaksina administrohen pa termin, kudo, pavarësisht vendbanimit apo shtetësisë. Edhe me ekipe mobile e me forma të organizuara brenda institucioneve, si ky rast sot”.
Zëvendësministrja Gexha-Bunjaku u bëri thirrje qytetarëve që të vaksinohen për ta fituar betejën kundër COVID-19.
“U bëj thirrje gjithë nxënësve të shkollave të përfitojnë nga ekipet tona e të vaksinohen, sepse nxënësit janë e ardhmja e shoqërisë. Rastësi, në këtë shkollë ndjekë mësimet edhe bija ime e madhe, e cila u vaksinua sot bashkë me shoqet e shokët e saj. Me këtë rast shpreh një falënderim e mirënjohje për administratën e shkollës për organizimin dhe profesionistët shëndetësor që janë në krye të detyrës”, tha Zëvendësministrja Gexha-Bunjaku.
Procesi i vaksinimit me ekipe mobile në shkolla do të vazhdojë edhe ditëve në vijim, ndërkohë që u bëhet thirrje të gjithë qytetarëve të moshës mbi 12 vjeçe që të shfrytëzojnë të gjitha mundësitë e krijuara për t’u vaksinuar kundër COVID-19, duke qenë që nuk kanë nevojë për terminë, dhe mund të vaksinohen kudo në Kosovë./21Media